[]
اسرائیل-حماس تنازعہ کے درمیان یمن کے حوثی باغیوں کی طرف سے بحیرہ احمر میں تجارتی جہازوں کو نشانہ بنانے کے واضح حوالے سے جے شنکر نے زور دے کر کہا کہ یہ ضروری ہے کہ اس مسئلے کو ’فوری طور پر حل کیا جائے‘
تہران: وزیر خارجہ ایس جے شنکر نے پیر کو ہندوستان کے ارد گرد بحری جہازوں پر حملوں کو بین الاقوامی برادری کے لئے شدید تشویش کا معاملہ قرار دیتے ہوئے کہا کہ اس طرح کے خطرات کا ہندوستان کی توانائی کی ضروریات اور اقتصادی مفادات پر براہ راست اثر پڑتا ہے۔ جے شنکر نے اپنے ایرانی ہم منصب حسین امیر عبداللہیان کے ساتھ وسیع مذاکرات کے بعد ایک مشترکہ پریس بیان میں کہا، ’’حال ہی میں بحر ہند کے اس اہم حصے میں سمندری تجارتی ٹریفک کی حفاظت کے لیے خطرات نمایاں طور پر بڑھ رہے ہیں۔‘‘
انہوں نے اسرائیل-حماس کے درمیان ایرانی حمایت یافتہ یمن کے حوثی باغیوں کی جانب سے مصروف ترین تجارتی گزرگاہوں میں شامل بحیرہ احمر میں تجارتی جہازوں کو نشانہ بنانے کے حوالے سے اس بات پر زور دیا کہ یہ ضروری ہے کہ اس مسئلہ کو فوری طور پر حل کیا جائے۔
خیال رہے کہ ہندوستانی وزیر خارجہ ایس جے شنکر ایران کے دو روزہ دورے پر ہیں۔ دورے کے پہلے دن انہوں نے ایران کے سڑک اور شہری ترقی کے وزیر مہرداد بذرپاش سے بھی ملاقات کی۔ اس دوران دونوں فریقین نے اسٹریٹجک لحاظ سے اہم چابہار بندرگاہ پر طویل المدتی تعاون کے فریم ورک کے قیام پر تفصیلی اور بامعنی بات چیت کی۔ جے شنکر نے بذرپاش کے ساتھ بین الاقوامی شمالی-جنوبی ٹرانسپورٹ کوریڈور (آئی این ایس ٹی سی) پر بھی تبادلہ خیال کیا۔
;
