ہریانہ میں خواتین پر مظالم کے واقعات میں تیزی سے اضافہ، این سی آر بی کی رپورٹ سے انکشاف

نئی دہلی: ملک کی راجدھانی دہلی کے بعد پڑوسی ریاست ہریانہ میں امن و امان پر سوالات اٹھ رہے ہیں۔ خواتین، بچوں اور بزرگوں کے خلاف جرائم میں اضافے کے باعث ریاست دوسرے نمبر پر پہنچ گئی۔ یہی نہیں جرائم کے مقدمات درج ہونے کے بعد پولیس کی کارروائی پر سوالیہ نشان اٹھ رہے ہیں۔ مقدمہ درج ہونے کے بعد بھی چارج شیٹ داخل کرنے میں ناکامی کی وجہ سے ریاست تیسرے نمبر پر پہنچ گئی ہے۔ اس سال ڈکیتی کے معاملے میں ہریانہ نے یوپی اور دہلی کو پیچھے چھوڑ دیا ہے۔ ریاست میں اغوا کی وارداتوں میں بھی اضافہ ہوا ہے۔

نیشنل کرائم ریکارڈ بیورو (این سی آر بی) کی سال 2022 کی رپورٹ ریاست میں عام لوگوں کے تحفظ کو لے کر تشویش پیدا کرنے والی ہے۔ این سی آر بی کی رپورٹ کے مطابق سال 2022 میں ریاست میں 2.43 لاکھ مجرمانہ معاملے درج کیے گئے ہیں۔ جو کہ سال 2021 کے مقابلے میں 17.6 فیصد زیادہ ہے۔

ریاست میں بچوں کے خلاف جرائم میں 7.7 فیصد اضافہ ہوا ہے۔ ریاست میں سال 2022 میں 6138 کیس درج کیے گئے تھے، جو سال 2021 میں 5700 اور 2020 میں 4338 تھے۔ ہریانہ کی پڑوسی ریاست پنجاب میں صرف 2494 کیس درج ہوئے ہیں۔ ہریانہ میں پوکسو ایکٹ کے تحت 1272 لڑکیوں کے جنسی استحصال کے معاملے بھی درج کیے گئے ہیں، اس کے علاوہ 68 لڑکوں کو بھی استحصال کا نشانہ بنایا گیا ہے۔

ہریانہ میں خواتین کی عصمت دری اور بچوں کے خلاف جرائم کے 57.2 فیصد مقدمات میں عدالت میں چارج شیٹ داخل کرنے کی شرح بھی کافی قابل رحم ہے۔ چارج شیٹ داخل کرنے کے معاملے میں ریاست تیسرے نمبر پر ہے۔ سال 2022 میں بچوں کے خلاف جرائم میں چارج شیٹ دائر کرنے کی شرح صرف 41.6 فیصد رہی ہے۔ ہریانہ میں فی ایک لاکھ خواتین کے خلاف جرائم کی شرح 118.7 فیصد تھی جب کہ دہلی میں یہ شرح 144.4 فیصد تھی۔ ریاست میں بزرگوں کے خلاف جرائم میں بھی 50 فیصد اضافہ ہوا ہے۔