نئی دہلی: الہ آباد ہائی کورٹ کے جسٹس یشونت ورما نے فوری اثر سے اپنے عہدے سے استعفیٰ دے دیا ہے اور یہ استعفیٰ انہوں نے صدر دروپدی مرمو کو ارسال کیا ہے۔ اس پیش رفت کے ساتھ ہی ان کے خلاف جاری مواخذہ کارروائی کے دوران ان کے عدالتی کیریئر کا اچانک اختتام ہو گیا، جس نے قانونی حلقوں سے وابستہ افراد کو حیران کر دیا۔
اپنے استعفیٰ نامہ میں جسٹس یشونت ورما نے لکھا کہ وہ اس معزز منصب پر ایسے اسباب کا بوجھ نہیں ڈالنا چاہتے جنہوں نے انہیں یہ قدم اٹھانے پر مجبور کیا۔ انہوں نے گہرے افسوس کا اظہار کرتے ہوئے کہا کہ اس عہدے پر خدمات انجام دینا ان کے لیے باعثِ اعزاز رہا ہے۔ ان کے اس خط کی ایک نقل ہندوستان کے چیف جسٹس سوریہ کانت کو بھی بھیجی گئی ہے۔
