[]
نئی دہلی: دہلی کے سندرنگری علاقہ میں منگل کے روز علاقہ کی ایک مندر میں پرساد کھانے پر ایک معذور مسلم شخص کو ہجوم نے مار پیٹ کی۔ اس واقعہ کے سلسلہ میں کئی افراد کو حراست میں لے لیا گیا ہے۔ پولیس نے یہ بات بتائی۔
اس واقعہ کا ایک ویڈیو سوشل میڈیا پر شیئر کیا گیا ہے جس میں ایک نوجوان محمد اسرار کو مدد کے لئے ہجوم سے اپیل کرتے ہوئے دیکھا جاسکتا ہے۔ اُس وقت وہ دردوکرب سے چلا رہا تھا۔ بہرحال ہجوم نے اس پر حملہ جاری رکھا۔
متاثرہ کے والد عبدالواجد کی شکایت کے مطابق منگل کی شام اس نے اپنے بیٹے کو گھر کے باہر پڑا ہوا پایا اور اس کے پورے جسم پر زخموں کے نشان تھے۔
اسرار نے اپنے والد کو بتایا کہ نوجوانوں کے ایک گروپ نے اس پر چوری کرنے کا الزام لگایا اور اُسے ایک کھمبے سے باندھ کر لاٹھیوں سے پٹائی کی۔ اس کا ایک پڑوسی حملہ کے بعد اسرار کو گھر واپس لے آیا۔ اس نے اسرار کے والد کو حملہ آوروں کی تفصیلات بھی بتائیں۔ بعدازاں اسرار اپنے زخموں سے جانبر نہ ہوسکا۔
اس واقعہ کی تحقیقات کا حکم دے دیا گیا ہے اور پولیس نے کہا کہ وہ لوگ سی سی ٹی وی کیمروں اور موبائل فونس پر لئے گئے ویڈیوز کے ذریعہ ملزمین کی شناخت کرنے کی کوشش کررہے ہیں۔
پولیس نے بتایا کہ ابتدائی تحقیقات سے پتہ چلتا ہے کہ مہلوک ذہنی طور پر معذور تھا اور جب حملہ آور اس کے سامنے آئے تو وہ ان کے سوالات کا مناسب جواب نہیں دے سکا۔
اسی دوران اس علاقہ میں پولیس تعینات کردی گئی ہے تاکہ کسی بھی ناخوشگوار واقعہ کو روکا جاسکے۔
