سعودی عرب کی حج 2025 کے لیے ویزا پالیسی میں اہم تبدیلیاں
سنئی دہلی ۔ سعودی عرب نے حج 2025 کے لیے اپنی ویزا پالیسی میں بڑی تبدیلیاں متعارف کروائی ہیں جن کا براہ راست اثر ہندوستان سمیت 14 ممالک پر پڑے گا۔ سعودی حکام نے ان نئے قواعد کے تحت ان ممالک کے شہریوں کے لیے ملٹی پل انٹری ویزا کو غیر معینہ مدت کے لیے معطل کر دیا ہے۔ اب ان شہریوں کو صرف سنگل انٹری ویزا حاصل کرنے کی اجازت ہوگی۔
یہ فیصلہ غیر قانونی طور پر حج کرنے والوں کو روکنے کے لیے کیا گیا ہے کیونکہ ملٹی پل انٹری ویزا رکھنے والے افراد اکثر بغیر اجازت حج میں شامل ہو جاتے تھے جس کی وجہ سے مکہ میں شدید ہجوم کا سامنا ہوتا تھا۔ سعودی حکام کے مطابق، اس اقدام کا مقصد مکہ میں حج کے دوران ہجوم کو کنٹرول کرنا اور حجاج کو بہتر سہولیات فراہم کرنا ہے۔
اس تبدیلی کا اثر ان 14 ممالک پر پڑے گا۔ ہندوستان، پاکستان، بنگلہ دیش، انڈونیشیا، مصر، الجزائر، مراکش، ایتھوپیا، عراق، اردن، نائجیریا، سوڈان، تیونس، اور یمنپر پڑے گا، ان ممالک کے شہری اب صرف 30 دن کے لیے قابل عمل سنگل انٹری ویزا کے لیے درخواست داخل کر سکیں گے۔ ملٹی پل انٹری ویزا پر پابندی عارضی طور پر عائد کی گئی ہے، تاہم حج، عمرہ، سفارتی اور رہائشی ویزوں پر یہ پابندی لاگو نہیں ہوگی۔
سعودی حکام نے بتایا کہ ملٹی پل انٹری ویزا کی وجہ سے کئی افراد غیر قانونی طور پر حج یا کام میں مصروف ہو جاتے تھے، جس کی وجہ سے انتظامات میں مشکلات پیش آتی تھیں۔ ہر سال لاکھوں مسلمان حج کے لیے مکہ آتے ہیں اور سعودی حکومت نے ہر ملک کے لیے مخصوص حج کوٹا مقرر کیا ہے۔
گزشتہ سال شدید گرمی کے دوران 1,200 سے زائد حجاج جاں بحق ہوئے تھے جن میں بیشتر غیر مجاز شامل تھے۔ اس سانحہ کے بعد سعودی حکام نے اس سال حج کے دوران مزید سخت اقدامات کرنے کا فیصلہ کیا۔ حکام کا کہنا ہے کہ ملٹی پل انٹری ویزا کی معطلی عارضی ہے لیکن اس پابندی کی مدت کے بارے میں کوئی واضح اعلان نہیں کیا گیا۔
