نئی دہلی: دہلی اسمبلی کی تمام 70 نشستوں کے لیے بدھ کی صبح 7 بجے ووٹنگ شروع ہوگئی اور شام 6 بجے تک جاری رہے گی۔
وزیر اعظم نریندر مودی اور مرکزی وزیر داخلہ امت شاہ نے قومی راجدھانی کے ووٹروں سے اپیل کی ہے کہ وہ گھروں سے باہر نکلیں اور بڑی تعداد میں ووٹ ڈالیں۔
راجدھانی کے بیشتر پولنگ اسٹیشنوں پر صبح سے ہی ووٹر اپنے حق رائے دہی کا استعمال کرتے ہوئے دیکھے گئے۔
مسٹر مودی نے سوشل میڈیا پر لکھا ’’دہلی اسمبلی انتخابات کی تمام سیٹوں کے لیے آج ووٹنگ ہوگی۔ میں یہاں کے ووٹروں سے اپیک کرتا ہوں کہ وہ جمہوریت کے اس تہوار میں پورے جوش و خروش کے ساتھ شرکت کریں اور اپنا قیمتی ووٹ ڈالیں۔
اس موقع پر ان تمام نوجوان دوستوں کے لیے میری خصوصی نیک خواہشات جو پہلی بار ووٹ ڈالنے جا رہے ہیں۔
آپ کو یاد رکھنا ہوگا- پہلے ووٹ، پھر کھانا پینا۔
اس کے ساتھ ہی وزیر داخلہ شاہ نے کہا ’’میں اپنی بہنوں اور بھائیوں سے اپیل کرتا ہوں جو دہلی اسمبلی انتخابات میں ووٹ ڈالنے جا رہے ہیں، جھوٹے وعدوں، آلودہ یمنا، شراب کی دکانوں، ٹوٹی ہوئی سڑکوں اور گندے پانی کے خلاف ووٹ دیں۔
آج ایک ایسی حکومت بنانے کے لیے بڑی تعداد میں ووٹ دیں جس کے پاس عوامی بہبود کا مضبوط ٹریک ریکارڈ ہو اور دہلی کی ترقی کے لیے واضح وژن ہو۔
آپ کا ایک ووٹ دہلی کو دنیا کا سب سے ترقی یافتہ دارالحکومت بنا سکتا ہے۔ پہلے ووٹ دو پھر کھانا پینا کریں۔
دہلی اسمبلی انتخابات میں 699 امیدوار اپنی قسمت آزما رہے ہیں، جن کی قسمت کا فیصلہ آج ووٹر الیکٹرانک ووٹنگ مشینوں میں قید کریں گے اور تمام امیدواروں کی قسمت کا فیصلہ 8 فروری کو ہوگا۔
یہ انتخاب تین بڑی جماعتوں کے درمیان ہے- حکمران عام آدمی پارٹی (آپ)، اپوزیشن بھارتیہ جنتا پارٹی (بی جے پی) اور کانگریس پارٹی۔ قومی راجدھانی میں بھی کئی سیٹوں پر سہ رخی مقابلہ دیکھنے کو ملے گا۔
انتخابی نتائج 8 فروری کو آئیں گے۔
ہمیں فالو کریں
