[]
بالی ووڈ کی فلم ‘لاپتہ لیڈیز’ آسکر ایوارڈ کیلئے شارٹ لسٹ نہیں ہوسکی، فلسطینی فلم نے جگہ بنالی
ممبئی۔ بالی ووڈ کی فلم ‘لاپتہ لیڈیز’ آسکر ایوارڈ کیلئے شارٹ لسٹ نہیں ہوسکی البتہ فلسطینی فلم نے جگہ بنالی۔ یہ فلم اداکار عامر خان کی سابقہ اہلیہ کرن راؤ کی ہدایتکاری میں بنائی گئی ہے۔ فلم ‘لاپتہ لیڈیز’ یکم مارچ 2024 کو ریلیز ہوئی۔ ہندوستان میں اس فلم کو کافی پسند کیا گیا تھا جس کے بعد اسے دنیا کے سب سے بڑے ایوارڈز آسکرز 2025 کے لیے نامزد کیا گیا تھا۔
فلم فیڈریشن آف انڈیا نے اعلان کیا تھا کہ فلم ‘لاپتہ لیڈیز’ کو آسکر ایوارڈز 2025 میں انٹرنیشنل فلم کیٹیگری کے لیے نامزد کیا گیا تھا۔اکیڈمی آف موشن پکچر آرٹس اینڈ سائنسز نے آج اعلان کیا کہ ہندوستانی فلم ‘لاپتہ لیڈیز’ ان 15 فلموں میں شامل نہیں ہوسکی جنہیں آخری 5 نامزدگیوں میں جگہ بنانی تھی تاہم برطانوی اور ہندوستانی فلمساز سندھیا سوری کی فلم ‘سنتوش’، جس میں ہندوستانی اداکارہ شاہانہ گوسوامی اور سونیتا راجوار نے اداکاری کی ہے، وہ برطانیہ کی جانب سے آسکر کے لیے شارٹ لسٹ کی گئی 15 فلموں میں شامل ہوگئی ہے۔
واضح رہے کہ ‘لاپتہ لیڈیز’ فلم میں ایک دلچسپ کہانی پیش کی گئی ہے جس میں ایک شخص کی بیوی ٹرین میں کسی اور شخص کی بیوی سے تبدیل ہوجاتی ہے۔ گھونگھٹ کی وجہ سے وہ اپنی بیوی کو پہچان نہیں پاتا اور یہ راز گاؤں پہنچنے کے بعد پتا چلتا ہے۔ بعدازاں وہ اپنی بیوی کو ڈھونڈنے کی کوشش کرتا ہے جبکہ جو لڑکی اس کے ساتھ آئی ہوئی ہوتی ہے وہ بھی اس کی مدد کرتی ہے
جو اعلیٰ تعلیم کے حصول کے لیے خود اپنی شادی ختم کرنا چاہتی ہے۔ اس فلم کے مرکزی کرداروں میں پراتبھا رانتا، سپارش شریواستو اور نیتانشی گوئل شامل ہیں۔
