[]
نئی دہلی: بی آر ایس کی قائد کویتا انفورسمنٹ ڈائرکٹوریٹ (ای ڈی) کے روبرو آج پیش نہیں ہوئیں۔ سرکاری عہدیداروں نے یہ بات بتائی اور کہا کہ دہلی اکسائز پالیسی سے مربوط منی لانڈرنگ کیس کے سلسلہ میں کویتا سے پوچھ تاچھ کے لئے ایجنسی کی جانب سے نوٹس جاری کی گئی تھی لیکن کویتا حاضر نہیں ہوئیں۔
سابق چیف منسٹر تلنگانہ کے چندر شیکھر راؤ کی 45 سالہ دختر سے ازسرنو پوچھ تاچھ کے لئے انفورسمنٹ ڈائرکٹوریٹ (ای ڈی) نے طلب کیا تھا۔ ایک ای میل کے ذریعہ کویتا کو سمن جاری کئے گئے تھے۔ کویتا کے وکیل نتیش رانا نے خبر رساں ادارہ پی ٹی آئی نمائندہ کے ساتھ بات چیت کرتے ہوئے بتایا کہ سپریم کورٹ حکم کے مطابق اِس کیس میں انفورسمنٹ ڈائرکٹوریٹ (ای ڈی) کویتا کو طلب نہیں کرسکتی۔
تاہم انفورسمنٹ ڈائرکٹوریٹ کے ذرائع نے کہا کہ بی آر ایس قائد نے گزشتہ سال سپریم کورٹ سے عارضی راحت حاصل کرلی تھی اور اب یہ کارآمد اور جائز نہیں رہی۔ فیڈرل ایجنسی کی جانب سے کویتا کو ازسرنو سمنس جاری کئے جانے کا امکان ہیں۔ ذرائع نے بتایا کہ ای ڈی کی جانب سے اِس سلسلہ میں عنقریب فیصلہ کیا جائے گا۔
بھارت راشٹرا سمیتی (بی آر ایس) کی ایم ایل سی نے ادعا کیا ہے کہ انہو ں نے بی جے پی کی زیر قیادت مرکزی حکومت پر ای ڈی کے غلط استعمال کا جو الزام عائد کیا تھا، وہ غیر درست نہیں تھا۔ انہوں نے کہا کہ زعفرانی پارٹی تلنگانہ میں پچھلے دروازہ سے داخل ہونے کی کوشش کررہی ہے۔
ہمیں فالو کریں
