بہار میں ایک اور ’پکڑوا شادی‘، نوکری لگتے ہی نوجوان کو جبراً رشتہ ازدواج میں منسلک کر دیا گیا

پٹنہ: بہار میں پکڑوا شادی (جبری شادی) کا ایک اور معاملہ سامنے آیا ہے۔ رپورٹ کے مطابق ایک شخص کو نوکری ملتے ہی زبردستی رشتہ ازدواج میں منسلک کر دیا گیا۔ جس نوجوان کے ساتھ خاتون کی شادی ہوئی اس کا الزام ہے کہ اسے بلیک میل کر کے ایسا کیا گیا۔ پولیس کے مطابق متاثرہ نوجوان کی شناخت مکیش کے نام سے ہوئی ہے جبکہ شادی شدہ خاتون کا نام پورنیما ہے۔ پولیس فی الحال اس معاملے کی تحقیقات کر رہی ہے۔

موصولہ اطلاع کے مطابق مکیش کچھ دن پہلے بی پی ایس سی کا امتحان پاس کرنے کے بعد ٹیچر بن گیا تھا۔ مکیش کو سرکاری نوکری ملتے ہی اس نے پورنیما سے بات کرنا چھوڑ دی تھی۔ جس کے بعد مقامی لوگوں نے مکیش کو پکڑ لیا اور گدھور پنچ مندر میں اس کی شادی کروا دی۔ اس پکڑوا شادی کی ویڈیو سوشل میڈیا پر وائرل ہو رہی ہے۔

اس ویڈیو میں دیکھا جا سکتا ہے کہ کس طرح مقامی لوگوں نے مکیش کو گھیر لیا ہے اور وہ ان سے پوچھ رہے ہیں کہ اگر وہ پورنیما سے شادی نہیں کرنا چاہتے تھے تو 2015 سے اس کے ساتھ تعلقات میں کیوں تھا؟ اس ویڈیو میں دیکھا جا رہا ہے کہ مکیش کہہ رہا ہے کہ اسے بلیک میل کیا جا رہا ہے۔

اس پکڑوا شادی کو دیکھنے کے لیے گدھور بازار سے سینکڑوں لوگوں کی بھیڑ مندر کے احاطے میں جمع ہو گئی۔ دونوں گزشتہ سال 2015 سے ایک دوسرے کے پیار میں تھے۔ جس کے بعد دونوں کے گھر والوں نے ان کی شادی طے کر دی تھی۔ شادی طے ہونے کے بعد مکیش اور پورنیما دونوں گھنٹوں ایک دوسرے سے باتیں کرنے لگے۔ اس دوران دونوں کے درمیان ملاقاتوں کا سلسلہ جاری رہا۔

جب سے مکیش نے بی پی ایس سی کا امتحان پاس کیا اور استاد کے طور پر منتخب ہوا، اس کے تئیں اس کا رویہ بدل گیا۔ پچھلے پانچ مہینوں سے نہ تو مکیش پورنیما کا فون اٹھا رہا تھا اور نہ ہی کوئی رابطہ رکھنا چاہتا تھا۔ جس سے اس کے گھر والے پریشان ہونے لگے اور یہ قدم اٹھایا۔