آخری ٹی-20 میچ بھی ہارا آسٹریلیا، ہندوستان نے سیریز 4-1 سے ہرا کر مہمان ٹیم کو کیا وداع

آج ہندوستان اور آسٹریلیا کے درمیان پانچ ٹی-20 میچوں کی سیریز کا آخری میچ کھیلا گیا جو انتہائی دلچسپ ثابت ہوا۔ آخری میچ میں ہندوستانی ٹیم کو 6 رنوں سے جیت حاصل ہوئی اور اس طرح میزبان ٹیم کو ہندوستان نے سیریز میں 4-1 سے شکست دے کر وداع کیا۔ اب ہندوستانی ٹیم جنوبی افریقہ کے خلاف اسی کی زمین پر ٹی-20، یک روزہ اور ٹیسٹ کرکٹ کی سیریز کھیلے گی۔

آج بنگلورو کے ایم چناسوامی اسٹیڈیم میں کھیلے گئے سیریز کے پانچویں اور آخری مقابلے میں ہندوستانی ٹیم نے 160 رنوں کے اسکور کا کامیابی کے ساتھ دفاع کیا۔ جب آسٹریلیائی ٹیم نے بلے بازی شروع کی تو بیشتر اوقات پر وہ حاوی دکھائی دی، لیکن آخر میں ہندوستانی گیندبازوں نے بازی کو پلٹ دیا اور ہندوستان کو 6 رنوں سے جیت دلا دی۔ اس کے ساتھ ہی سوریہ کمار یادو اپنی کپتانی میں پہلی ہی سیریز جیتنے میں کامیاب ہو گئے۔

آج آسٹریلیائی کپتان میتھیو ویڈ نے ٹاس جیت کر پہلے گیندبازی کرنے کا فیصلہ کیا تھا اور امید کی جا رہی تھی کہ حسب سابق چناسوامی کی پچ پر رنوں کی بارش ہوگی۔ حالانکہ ایسا کچھ دیکھنے کو نہیں ملا۔ ہندوستان کی طرف سے شریئس ایر نے 37 گیندوں پر سب سے زیادہ 53 رن بنائے، جبکہ اکشر پٹیل نے 21 گیندوں پر 31 رن اور جتیش شرما نے 16 گیندوں پر 24 رنوں کی اننگ کھیلی۔ ہندوستانی ٹیم مقررہ 20 اوورس میں کسی طرح 8 وکٹ کے نقصان پر 160 رن بنانے میں کامیاب ہوئی۔ آسٹریلیا کی جانب سے بہرنڈورف اور ڈوارشوئس نے 2-2 وکٹ لیے، جبکہ آرون ہارڈی، ناتھن ایلس اور تنویر سنگھا کو 1-1 وکٹ ملے۔

آسٹریلیا کی طرف سے بھی محض ایک ہی بلے باز بڑی اننگ کھیلنے میں کامیاب ہو سکا اور وہ تھے بیک میکڈرماٹ جنھوں نے 36 گیندوں پر 54 رن بنائے۔ کپتان میتھیو ویڈ نے آخر میں 15 گیندوں 22 رن ضرور بنائے، لیکن وہ جیت کے لیے کافی نہیں تھے۔ ٹریوس ہیڈ نے بھی 18 گیندوں پر 28 رنوں کا تعاون دیا۔ پانچ بلے باز تو دوہرے ہندسے تک بھی نہیں پہنچ سکے۔ نتیجہ یہ ہوا کہ 20 اوورس میں آسٹریلیائی ٹیم 8 وکٹ کے نقصان پر 154 رن ہی بنا سکی اور شکست سے دو چار ہوئی۔ گیندبازی میں ہندوستان کی طرف سے مکیش کمار نے ایک بار پھر شاندار کارکردگی کا مظاہرہ کیا۔ انھوں نے 4 اوورس میں 32 رن دے کر 3 کھلاڑیوں کو آؤٹ کیا۔ 2-2 وکٹ عرشدیپ سنگھ اور روی بشنوئی کو حاصل ہوئے۔ اکشر پٹیل انتہائی کفایتی رہے جنھوں نے 4 اوورس میں محض 14 رن دے کر ایک وکٹ لیا۔