ایک پرائیویٹ ٹراویلس کی بس نے جمعرات کی صبح ضلع محبوب نگر جڑچرلہ کے قریب ماچارم فلائی اوور پر کیمیکل لے جانے والے ٹینکر کو ٹکر دے دی حکام کے مطابق تمام مسافر محفوظ رہے۔
بس میں تقریباً 26 مسافر سفر کر رہے تھے بس آندھرا پردیش کے چِتّور سے حیدرآباد آ رہی تھی۔ بس نے پیچھے سے ٹینکر کو ٹکر دے دی جس کے نتیجے میں ہائیڈروکلورائیڈ ایسڈ سڑک پر بہہ گیا۔ بس ڈرائیور نے جوکسی کا مظاہرہ کرتے ہوئے فوراً تمام مسافروں کو اترنے کو کہا اس حادثہ میں چند افراد کو ہلکی چوٹیں آئیں۔
رپورٹس میں بتایا گیا کہ حادثہ کے بعد آگ نہیں لگی جس کی وجہ سے ایک بڑا حادثہ ٹل گیا۔فائر ٹینڈر موقع پر پہنچے اور ملازمین نے صورتحال پر قابو پا لیا۔ حادثہ کے بعد نیشنل ہائی وے 44 پر ٹریفک متاثر ہوئی۔
حکام نے حادثہ کا شکار بس کے مسافروں کو دوسری بس میں حیدرآباد منتقل کر دیا۔
