[]
ماسکو: اسرائیلی وزیراعظم بنجامن نتن یاہو کے فلسطینیوں سے غزہ خالی کرنے کے مطالبہ پر روسی صدر پوٹین کی جانب سے سخت رد عمل سامنے آیا ہے۔
بین الاقوامی خبر رساں ایجنسی کی رپورٹ کے مطابق روسی صدر ولادیمیر پوٹین نے اسرائیلی وزیر اعظم کے مطالبے پر اپنے ردعمل میں کہا کہ یہ فلسطینیوں کی زمین ہے جہاں انہیں رہنا ہے، غزہ فلسطین کی تاریخی سرزمین کا حصہ ہے۔
روسی صدر نے اپنے بیان میں کہا کہ غزہ سمیت آزاد فلسطینی ریاست قائم کرنی ہوگی، فلسطینیوں کوغزہ پٹی سے نکل کر مصر کے علاقہ سنیائی جانے کا کہنے سے امن قائم نہیں ہوسکتا۔
واضح رہے کہ اسرائیلی وزیراعظم کی جانب سے غزہ پر حملے کی دھمکی دیتے ہوئے وارننگ دی گئی تھی کہ فلسطینی غزہ کو خالی کردیں۔
رپورٹس کے مطابق اسرائیلی وزیراعظم کی جانب سے یہ دھمکی دی گئی تھی کہ یہ جنگ طویل اور مشکل ہوگی، فلسطینی غزہ کو خالی کردیں، حماس سے بدلہ لیں گے، اسرائیل کی جانب سے ہر جگہ بھرپور طاقت کا استعمال کیا جائے گا۔
اسرائیلی وزیراعظم نے کہا تھا کہ یقینی بنایا جائے گا کہ ایسا اب کبھی نہ ہوسکے، اسرائیل میں جو ہفتے کو ہوا وہ کبھی نہیں ہوا تھا، یہ اسرائیلیوں پر بہت مشکل دن گزرا ہے۔نیتن یاہو کا کہنا تھا کہ یرغمال بنائے اسرائیلیوں کے تحفظ کی ذمہ داری حماس پر عائد ہوتی ہے، کس کو کچھ بھی ہوا اس کا پورا حساب لیا جائے گا۔
