تلنگانہ کے محبوب نگر شہر سے تعلق رکھنے والے پانچ افراد، جو مسجد کے توغرے لینے کے لیے ممبئی گئے تھے، واپسی کے دوران ظہیر آباد ہائی وے پر ایک المناک سڑک حادثے کا شکار ہوگئے۔ اس حادثے میں خواجہ فیروز الدین موقع پر ہی جاں بحق ہوگئے، جبکہ چار دیگر افراد شدید زخمی ہوگئے۔
یہ افراد سحری کے بعد محبوب نگر کے لیے روانہ ہوئے تھے کہ راستے میں ظہیر آباد ہائی وے پر ان کی کار بے قابو ہو کر ڈیوائیڈر سے ٹکرا گئی حادثے کے نتیجے میں گاڑی بری طرح متاثر ہوئی، اور زخمیوں کو فوری طور پر حیدرآباد کے عثمانیہ اسپتال منتقل کیا گیا۔
حادثے کی اطلاع ملتے ہی محبوب نگر ٹاؤن صدر مجلس اور سابقہ وارڈ کونسلر سید سعادت اللہ حسینی نے صدر کل ہند مجلس اتحادالمسلمین و رکن پارلیمنٹ حیدرآباد بیرسٹر اسدالدین اویسی سے فون پر رابطہ کیا اور انہیں واقعے کی تفصیلات سے آگاہ کیا۔
بیرسٹر اویسی نے فوری طور پر ایم ایل سی مرزا رحمت بیگ اور مجلس کے کوآرڈینیٹر و انچارج متحدہ ضلع محبوب نگر جابر بن سعید الجابری کو ہدایت دی کہ وہ زخمیوں کے علاج و معالجے کا جائزہ لیں اور انہیں بہترین طبی سہولیات فراہم کرائی جائیں
ایم ایل سی رحمت بیگ اور جابر بن سعید الجابری فوراً عثمانیہ اسپتال پہنچے، جہاں انہوں نے ڈاکٹروں سے ملاقات کی اور زخمیوں کی حالت کا تین گھنٹے تک جائزہ لیا۔ مزید برآں، محمد رضی الدین کی حالت نازک ہونے کے سبب انہیں مزید بہتر علاج کے لیے **کئیر اسپتال، نامپلی** منتقل کیا گیا۔
یہ تمام افراد مجلس اتحادالمسلمین کے سرگرم کارکن بتائے جا رہے ہیں، جن کی جلد صحت یابی کے لیے پارٹی رہنماؤں نے ہر ممکن مدد فراہم کرنے کا یقین دلایا ہے۔ حادثے کی خبر ملتے ہی علاقے میں غم کی لہر دوڑ گئی، اور متاثرہ خاندانوں سے اظہار ہمدردی کا سلسلہ جاری ہے۔
