حیدرآباد: ریاست تلنگانہ میں 15 مارچ سے بچوں کو آدھے دن کا اسکول (Half Day Schools) ہوگا۔ اس سلسلے میں محکمہ تعلیمات نے احکامات جاری کر دیے ہیں۔
موسم گرما کے پیش نظر سرکاری، امدادی اور خانگی انتظامیہ کے تحت چلائے جانے والے تمام پرائمری، اپر پرائمری اور ہائی اسکولس 15 مارچ سے 23 اپریل تک صبح 8 بجے سے دوپہر 12:30 بجے تک کام کریں گے۔
جن اسکولس میں مڈ ڈے میل کا انتظام ہے وہاں کے طلبہ کو 12:30 بجے دوپہر کا کھانا فراہم کرنے کے بعد گھر بھیج دیا جائے گا۔دسویں جماعت کے طلبہ کے لیے خصوصی کلاسز جاری رہیں گی۔محکمہ تعلیم کے ڈائریکٹر نے واضح کیا ہے کہ دسویں جماعت (SSC) کے امتحانات کے لیے طلبہ کو امتحانات کیلئے تیار کرنے کے مقصد سے خصوصی کلاسیس جاری رہیں گی۔
انہوں نے بتایا کہ ایس ایس سی امتحانی مراکز کے طور پر مقرر کردہ اسکولس دوپہر 1 بجے سے شام 5 بجے تک کام کریں گے۔ تعلیمی سال 2024-25 کے آخری دن 23 اپریل تک بچوں کی آدھے دن کا اسکول ہوگا۔
محکمہ تعلیم نے ریجنل جوائنٹ ڈائریکٹرس اور ضلع تعلیمی عہدیداروں کو ہدایت دی ہے کہ وہ اس حکم نامے کو تمام اسکولوں میں نافذ کرنے کے لیے ضروری اقدامات کریں۔
