ابوظبی: ابوظبی کی شیخ زید مسجد میں متحدہ عرب امارات (یو اے ای) کا سب سے بڑا دستر خوان سج گیا۔ روزانہ 35 ہزار سے زائد افراد کے لئے افطاری کا اہتمام کیا جاتا ہے۔
غیر ملکی ذرائع ابلاغ کے مطابق تمام افراد کو افطار اور کھانے کی سہولتیں پہنچانے کے لیے روزانہ 12 ٹن مرغی اور 6 ٹن بکرے کا گوشت پکایا جاتا ہے جن سے مزیدار طعام بنانے کے لیے تقریباً ایک ہزار اسٹاف تعینات ہے۔
یہ سب مل کر حفظانِ صحت کے بین الاقوامی معیارات کو ملحوظِ خاطر رکھتے ہوئے کھانے کی خریداری‘ صفائی‘ پکوان کی تیاری اور دیگر امور سنبھالتے ہیں۔واضح رہے کہ ابوظبی کی شیخ زید مسجد میں افطاری کا اہتمام ہر سال کیا جاتا ہے۔
دوسری جانب واضح رہے کہ دبئی پولیس نے رمضان المبارک کی مناسبت سے عقلمندی سے عطیہ دیں کے عنوان سے ایک آگاہی مہم کا آغاز کیا ہے۔دبئی پولیس کی جانب سے شروع کی گئی اس مہم کا مقصد عوام کو پیشہ ور گداگروں کے دھوکہ سے بچانا اور مستحق افراد کی صحیح طریقہ سے مدد کو یقینی بنانا ہے۔
رپورٹس کے مطابق پولیس نے عوام کو خبردار کرتے ہوئے کہا ہے کہ وہ سڑکوں‘ مساجد اور عام مقامات کے قریب گھومنے والے گداگروں کی جھوٹی کہانیوں کے جھانسہ میں نہ آئیں۔
دبئی پولیس کے مطابق یہ پیشہ ور گداگر لوگوں کی ہمدردی کا غلط فائدہ اٹھاتے ہیں اور ان کے عطیات کا غلط استعمال کرتے ہیں۔پولیس نے عوام سے اپیل کی ہے کہ عطیات صرف مستند فلاحی اداروں کو دیں اور گداگری کی مشکوک سرگرمی کی اطلاع فوری طور پر پولیس کو دیں۔
ہمیں فالو کریں
