سری نگر: محکمہ موسمیات کی پیش گوئی کےعین مطابق وادی کشمیر میں گذشتہ چوبیس گھنٹوں کے دوران سیاحتی مقام گلمرگ سمیت کئی پہاڑی علاقوں میں تازہ ہلکی برف باری ہوئی جبکہ میدانی علاقوں میں رک رک کر بارشیں ہوئیں۔
سری نگر میں گذشتہ چوبیس گھنٹوں کے دوران 7.8 ملی میٹر بارش ریکارڈ ہوئی ہے۔
سیاحتی مقامات گلمرگ اور پہلگام میں اس دوران بالترتیب1.2 ملی میٹر اور 11.8 ملی میٹر بارش ریکارڈ ہوئی ہے۔
سرحدی ضلع کپوارہ میں گذشتہ چوبیس گھنٹوں کے دوران12.0 ملی میٹر بارش ریکارڈ ہوئی ہے جبکہ گیٹ وے آف کشمیر کے نام سے مشہور قاضی گنڈ میں 6.8 ملی میٹر بارش ریکارڈ ہوئی ہے۔
متعلقہ محکمے کے مطابق وادی میں خراب موسمی صورتحال کا سلسلہ 16 مارچ تک جاری رہنے کا امکان ہے۔
ان کا کہنا تھا کہ وادی میں 11 مارچ کو پہاڑی علاقوں میں کہیں کہیں ہلکی برف باری یا بارشوں کا امکان ہے جبکہ اس دوران میدانی علاقوں میں ہلکی بارشیں ہوسکتی ہیں۔
موصوف ترجمان نے بتایا کہ 12 اور 14 مارچ کو وادی میں کئی مقامات پر ہلکی برف باری یا بارشیں متوقع ہیں جبکہ 15 اور 16 مارچ کو بھی کئی مقامات پر رک رک کر ہلکی سے درمیانی درجے کی برف باری یا بارشوں کا امکان ہے۔
انہوں نے کہا کہ بعد ازاں وادی میں 17 سے 21 مارچ تک موسم عام طور پر خشک رہنے کی توقع ہے۔
محکمے نے اپنی ایڈوائزری میں سیاحوں، مسافروں اور ٹرانسپورٹروں سے ٹریفک ایڈوائزری پر عمل کرنے کو کہا ہے جبکہ کسانوں سے کہا گیا ہے کہ وہ 10 سے 18 مارچ تک اپنے کھیت کھلیانوں اور باغوں میں آپریشنز معطل رکھنے کی صلاح دی ہے۔
علاوہ ازیں لوگوں سے ان علاقوں جہاں برفانی تودے گر آنے کے خطرات رہتے ہیں، میں جانے سے احتراز کرنے کی اپیل کی ہے۔
دریں اثنا خراب موسمی صورتحال کے باعث وادی کے شبانہ درجہ حرارت میں قدرے گراوٹ درج ہوئی ہے۔
گرمائی دارلحکومت میں کم سے کم درجہ حرارت3.7 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت 5.6 ڈگری سینٹی گریڈ ریکارڈ ہوا تھا۔
وادی کے شہرہ آفاق سیاحتی مقام گلمرگ میں کم سے کم درجہ حرارت 0.5 ڈگری سینٹی گریڈ ریکارڈ کیا گیا جہاں گذشتہ شب بھی یہی درجہ حرارت ریکارڈ ہوا تھا۔
وادی کے دوسرے مشہور سیاحتی مقام پہلگام میں کم سے کم درجہ حرارت 2.6 ڈگری سینٹی گریڈ ریکارڈ کیا گیا جہاں گذشتہ شب کا درجہ حرارت4.6 ڈگری سینٹی گریڈ ریکارڈ ہوا تھا۔
ہمیں فالو کریں
