ممبئی: زیر تعمیر عمارت میں پانی کی ٹنکی صاف کرنے اترے 4 مزدوروں کی دم گھٹنے سے موت

ممبئی کے ناگپاڑا میں اتوار (9 مارچ) کو ایک اندوہناک حادثہ پیش آیا ہے۔ زیر تعمیر عمارت میں پانی کی ٹنکی کی صفائی کرنے لیے اندر داخل ہونے والے 5 میں سے 4 مزدوروں کی دم گھوٹنے سے موت ہو گئی۔ ٹنکی کے اندر صفائی کر رہے مزدوروں کو جب بے چینی محسوس ہوئی تو انہیں فائر بریگیڈ کی مدد سے باہر نکالا گیا اور فوری طور پر ممبئی کے جے جے اسپتال میں داخل کرایا گیا، جہاں ڈاکٹروں نے 5 میں سے 4 کو مردہ قرار دے دیا۔

میونسپل کارپوریشن کے ایک افسر نے حادثے کے حوالے سے بتایا کہ ’’یہ حادثہ ممبئی کے ناگپاڑا علاقے میں دمٹی مکر روڈ پر واقع بسم اللہ اسپیس بلڈنگ میں دوپہر کے قریب 12:30 بجے پیش آیا۔ صفائی کے لیے 5 لوگ ٹنکی میں داخل ہوئے اور بیہوش ہو گئے۔ انہیں فائر بریگیڈ کے ذریعہ نکال کر جے جے اسپتال میں داخل کرایا گیا، جہاں ڈاکٹروں نے 5 میں سے 4 کو مردہ قرار دے دیا۔‘‘حادثے میں مرنے والوں کی پہچان ہو گئی ہے، ان کے نام حسیب شیخ (19)، راجا شیخ (20)، ضیاء اللہ شیخ (36) اور عماد شیخ کے طور پر ہوئی ہے۔ جب کہ پانچویں شخص فرحان شیخ (31) اسپتال میں زیر علاج ہے۔

جے جے پولیس اسٹیشن کے ایک افسر نے بتایا کہ ایک حادثاتی موت کی رپورٹ (اے ڈی آر) درج کر لی گئی ہے۔ ساتھ ہی یہ جاننے کے لیے تحقیقات شروع کر دی گئی ہے کہ پانچوں کو کام پر رکھنے والوں کی جانب سے کوئی کوتاہی ہوئی تھی یا نہیں؟ اور حفاظتی پروٹوکول پر عمل کیا گیا تھا یا نہیں؟ تحقیقات میں جو نتائج سامنے آئیں گے اس کی بنیاد پر آگے کی کارروائی کی جائے گی۔ قابل ذکر ہے کہ ابتدائی تحقیقات مرنے والے مزدورں کے حوالے سے یہ خبر نکل کر سامنے آئی ہے کے یہ پانچوں مزدور کنٹریکٹ ورکر تھے۔