حیدرآباد: تلنگانہ کے ضلع ناگرکرنول میں منہدم ایس ایل بی سی سرنگ میں پھنسے ہوئے مزدوروں کی تلاش کے لئے بچاوآپریشن تیزی سے جاری ہے۔ گمشدہ افراد کا پتہ لگانے میں کچھ پیش رفت ہوئی ہے۔
اطلاعات کے مطابق، حادثہ کی جگہ سے تقریباً 100 میٹر دور ڈی-2 پوائنٹ پر کیرل سے لائے گئے خصوصی تربیت یافتہ کتے انسانی موجودگی کے نشانات کا پتہ لگانے میں کامیاب ہوئے ہیں۔ اس اطلاع کے بعد، امدادی عملے نے انتہائی احتیاط سے مٹی ہٹانے کا کام شروع کر دیا ہے۔
اس حادثہ میں آٹھ مزدور سرنگ میں پھنس گئے تھے۔ ہفتہ کی رات، ایک شخص کے باقیات پائے گئے تھے۔ گمشدہ مزدوروں کا سراغ لگانے کے لیے پچھلے 15 دنوں سے مختلف ایجنسیوں کے مزدور مسلسل کام کر رہے ہیں۔
سرنگ کے ڈی-2 پوائنٹ پر کھدائی کے دوران 6 فٹ کی گہرائی میں ایک فرد کا دایاں ہاتھ ملا ہے۔
مزدوروں نے فوری طور پر اعلیٰ حکام کو اس بات کی اطلاع دی۔ لاش کو باہر نکالنے کے لیے حکام کی نگرانی میں مزید 2 فٹ چوڑائی اور آدھا فٹ گہرائی میں کھدائی جاری ہے۔
اندازہ لگایا جا رہا ہے کہ اسی مقام کے قریب ایک اور لاش بھی موجود ہو سکتی ہے۔بچاوآپریشن مکمل احتیاط اور حکام کی ہدایات کے مطابق کیا جا رہا ہے، تاکہ پھنسے ہوئے مزدوروں کو جلد از جلد نکالا جا سکے۔واضح رہے کہ 22فروری کو ایس ایل بی سی سرنگ کا ایک حصہ منہدم ہو گیاتھاجس کے نتیجہ میں آٹھ مزدور ملبے میں پھنس گئے۔
ہمیں فالو کریں
