ممبئی: این سی پی (ایس پی) کی سینئر رہنما اور رکن پارلیمنٹ سپریا سولے نے کہا ہے کہ ایک مضبوط جمہوریت کے لیے اپوزیشن کا مؤثر کردار ہونا لازمی ہے۔ انہوں نے ہفتے کے روز میڈیا سے گفتگو میں کہا، ’’چاہے ملک کی سطح پر ہو یا ریاست کی، میں سمجھتی ہوں کہ جمہوریت کو مستحکم رکھنے کے لیے اپوزیشن کا ہونا نہایت ضروری ہے۔‘‘
سپریا سولے نے کہا کہ مہاراشٹر میں اپوزیشن لیڈر کا عہدہ جلد طے ہونا چاہیے۔ انہوں نے اپیل کی کہ ریاست میں حکومت سازی میں شامل جماعتیں اپوزیشن کو قائد حزب اختلاف کے انتخاب کا موقع دیں۔ ان کا کہنا تھا، ’’مجھے امید ہے کہ فڈنویس حکومت بڑے دل کا مظاہرہ کرتے ہوئے اپوزیشن کو اپوزیشن لیڈر کے انتخاب کی آزادی دے گی۔‘‘
