میٹنگ کے بعد کانگریس رکن پارلیمنٹ گورو گگوئی نے کہا کہ اگر آسام میں جمہوریت کو بچانا ہے تو وہاں کی بدعنوان بی جے پی حکومت کو اکھاڑ پھینکنا ہوگا، سبھی جانتے ہیں کہ اس وقت سماج میں بدامنی کا ماحول ہے۔
کانگریس کی اعلیٰ قیادت آسام کے سرکردہ پارٹی لیڈران کے ساتھ، تصویر @INCIndia
کانگریس کی اعلیٰ قیادت نے آسام کے اپنے سرکردہ لیڈران کے ساتھ 27 فروری کو انتہائی اہم میٹنگ کی۔ یہ میٹنگ آئندہ سال آسام میں ہونے والے اسمبلی انتخاب کی تیاریوں اور حکمت عملی پر تبادلہ خیال کرنے کے مقصد سے ہوئی۔ کانگریس ہیڈکوارٹر ’اندرا بھون‘ میں ہوئی اس میٹنگ میں پارٹی صدر ملکارجن کھڑگے اور سابق صدر راہل گاندھی کے علاوہ پارٹی کے آسام انچارج جتیندر سنگھ، آسام کانگریس کمیٹی کے صدر بھوپین بورا، لوک سبھا رکن گورو گگوئی اور ریاست کے کئی دیگر لیڈران شامل تھے۔
میٹنگ کے بعد کانگریس رکن پارلیمنٹ گورو گگوئی نے میڈیا سے بات کرتے ہوئے کہا کہ ’’کانگریس صدر ملکارجن کھڑگے اور راہل گاندھی نے آئندہ سال انتخاب والی ہر ریاست کی قیادت سے بات کی ہے۔ انھوں نے ہماری بات سنی اور ہمیں آگے بڑھنے کی ہدایت دی۔‘‘ انھوں نے مزید کہا کہ ’’اگر ہمیں آسام میں جمہوریت کو بچانا ہے تو وہاں کی بدعنوان بی جے پی حکومت کو اکھاڑ پھینکنا ہوگا۔ سبھی جانتے ہیں کہ سماج میں بدامنی کا ماحول ہے۔ وزیر اعلیٰ ہیمنت بسوا سرما نے بدعنوانی کی جو لنکا لگائی ہے، اسے تباہ کرنا ہوگا۔‘‘
آسام انچارج اور کانگریس جنرل سکریٹری جتیندر سنگھ نے بھی میٹنگ کے بعد میڈیا سے بات کی۔ انھوں نے کہا کہ آج آسام کے ہر علاقے سے کانگریس لیڈران اس میٹنگ میں موجود تھے۔ اس میٹنگ میں آئندہ آسام اسمبلی انتخاب کی حکمت عملی سے متعلق گفت و شنید ہوئی۔ یہ بات بھی میٹنگ میں رکھی گئی کہ آسام کے وزیر اعلیٰ ریاست کو فروخت کر رہے ہیں، مافیا گری کر رہے ہیں اور سنڈیکیٹ چلا رہے ہیں۔ اس سے آسام کی عوام بہت تکلیف میں ہے۔ میٹنگ میں یہ بھی طے ہوا کہ کانگریس صدر کھڑگے، حزب اختلاف کے قائد راہل گاندھی اور کانگریس جنرل سکریٹری پرینکا گاندھی آسام کا دورہ کریں گے، وہاں ان کی ریلیاں بھی ہوں گی۔ وہ مزید کہتے ہیں کہ آسام میں بی جے پی اور اس کے وزیر اعلیٰ گھبرائے ہوئے ہیں، جبکہ کانگریس بے حد مضبوطی سے کام کر رہی ہے اور آسام کی عوام کے لیے لڑ رہی ہے۔
واضح رہے کہ آسام میں کانگریس نے بی جے پی حکومت اور وزیر اعلیٰ ہیمنت بسوا سرما کے خلاف بدعنوانی معاملے پر محاذ کھول رکھا ہے۔ آج ہوئی میٹنگ کے بعد ریاستی حکومت پر حملہ مزید تیز ہونے کے آثار نظر آ رہے ہیں۔ بہر حال، جمعہ کو کانگریس قیادت کیرالہ کے پارٹی لیڈران کے ساتھ میٹنگ کرنے والی ہے۔ کیرالہ میں بھی کانگریس اہم اپوزیشن پارٹی ہے۔ کیرالہ اور آسام دونوں ہی ریاستوں میں آئندہ سال مارچ-اپریل میں اسمبلی انتخابات ممکن ہیں۔
