مہر خبررساں ایجنسی کے مطابق، وائٹ ہاؤس کی ترجمان کیرولین لیویٹ نے کہا ہے کہ ریاض میں روس اور امریکہ کے درمیان ہونے والی بات چیت یوکرین میں جنگ کے خاتمے کی جانب ایک بہت بڑا قدم ہے۔
انہوں نے سابق صدر جو بائیڈن پر تنقید کرتے ہوئے کہا کہ سابقہ حکومت نے اس سلسلے میں عملی طور پر کوئی سفارت کاری نہیں کی۔”
واضح رہے کہ روس کے سفارتی وفد نے وزیر خارجہ سرگئی لاوروف کی سربراہی میں گزشتہ روز ریاض میں ان کے امریکی ہم منصب مارکو روبیو اور دیگر سفارت کاروں سے بات چیت کی۔
ان مذاکرات کا مقصد ماسکو اور کیف کے درمیان دیرپا امن کے قیام کے لیے ایک پلیٹ فارم فراہم کرنا ہے۔
اس کے علاوہ ان مذاکرات میں روس اور امریکہ کے درمیان تعلقات کو معمول پر لانے پر بھی بات کی گئی۔
اس سے قبل کریملن نے بھی ریاض مذاکرات کو یوکرین میں امن کے حصول کی جانب ایک اہم قدم قرار دیا تھا۔
