ڈان گروپ آف اسکولس حیدرآباد کے مینجمینٹ ڈایریکٹر جناب واصی الرحمان کو سی آئی ٹی ڈی گلوبل ایجوکیشنل اینڈ ٹریڈ پرموشن ایوارڈ 2025 سے نوازا گیا۔ یہ اعزاز تلنگانہ کے گورنر جناب جیشنو دیو ورما کے ہاتھوں پیش کیا گیا، جبکہ اس موقع پر لیسوتھو کے اعزازی قونصل اور سی آئی ٹی ڈی انڈیا کے صدر ڈاکٹر سرت سنگھ ملہوترا بھی موجود تھے۔ اس تقریب میں ڈان گروپ اسکولس کے ڈایریکٹر فضل الرحمان خرم کی شرکت بھی خاص اہمیت کی حامل تھی۔
یہ ایوارڈ تعلیمی شعبے میں مصنوعی ذہانت (AI) اور روبوٹکس کے بہتر استعمال کے اعتراف میں دیا گیا۔ آج کے جدید دور میں ٹیکنالوجی کا تعلیمی میدان میں استعمال وقت کی اہم ضرورت بن چکا ہے، اور ڈان گروپ آف اسکولز نے اس میدان میں ایک نمایاں مقام حاصل کیا ہے۔ اسکول میں جدید ٹیکنالوجیز کو نصاب کا حصہ بنایا گیا ہے تاکہ طلبہ کو مستقبل کے تقاضوں کے مطابق تیار کیا جا سکے۔
ڈان گروپ آف اسکولس کے مینیجنگ ڈائریکٹر واصی الرحمان نے ایوارڈ وصول کرتے ہوئے کہا کہ یہ صرف ان کی نہیں بلکہ پورے ادارے کی محنت کا نتیجہ ہے۔ ان کا کہنا تھا کہ تعلیم کو جدید تقاضوں سے ہم آہنگ کرنا ضروری ہے تاکہ ہمارے بچے آگے جا کر عالمی سطح پر مقابلہ کر سکیں۔ انہوں نے مزید کہا کہ مصنوعی ذہانت اور روبوٹکس جیسی جدید ٹیکنالوجیز صرف ایک مضمون نہیں بلکہ ایک انقلاب ہے جو آنے والے وقتوں میں ہر فیلڈ میں اہم کردار ادا کرے گی۔
اس موقع پر گورنر تلنگانہ جیشنو دیو ورما نے بھی خطاب کیا اور کہا کہ آج کے تعلیمی اداروں کو صرف کتابی تعلیم تک محدود نہیں رہنا چاہیے، بلکہ عملی تجربہ اور ٹیکنالوجی کا استعمال بھی لازمی ہے۔ انہوں نے ڈان گروپ آف اسکولز کی کاوشوں کو سراہتے ہوئے امید ظاہر کی کہ یہ ادارہ مستقبل میں بھی تعلیمی میدان میں نئی بلندیوں کو چھوئے گا۔
ایوارڈ تقریب کے بعد مہمانوں اور تعلیمی ماہرین کے درمیان ایک خصوصی نشست بھی ہوئی، جس میں تعلیمی اصلاحات اور ٹیکنالوجی کے کردار پر تبادلہ خیال کیا گیا۔ شرکاء نے اس بات پر زور دیا کہ اسکولوں میں جدید سائنسی اصولوں کو عملی طور پر نافذ کرنے کے لیے مزید اقدامات کرنے کی ضرورت ہے تاکہ طلبہ کو محض نظریاتی معلومات نہیں بلکہ عملی تجربہ بھی حاصل ہو۔
