حضرت مولانا حافظ پیر شبیر احمد صاحب دامت برکاتہم، صدر جمعیۃ علماء تلنگانہ و آندھراپردیش کی سرپرستی میں جمعیۃ علماء متحدہ ضلع کریم نگر کا تربیتی و مشاورتی اجلاس 1 فروری بروز ہفتہ صبح 09:30 بجے سے دوپہر 02:00 بجے تک مدرسہ اسلامیہ تجوید القرآن مسجد کوثر سینٹری کالونی، منڈل را ماگری ضلع پداپلی، تلنگانہ میں منعقد ہوا۔
اجلاس کی صدارت حضرت مفتی محمد یونس القاسمی صاحب، صدر جمعیۃ علماء ضلع کریم نگر نے کی، جبکہ مہمان خصوصی کی حیثیت سے حرکیاتی قائد محترم حافظ پیر خلیق احمد صابر صاحب، جنرل سکریٹری جمعیۃ علماء تلنگانہ و آندھرا نے شرکت کی۔
اجلاس سے خطاب کرتے ہوئے حافظ پیر خلیق احمد صابر صاحب نے کہا کہ جمعیۃ علماء کسی بھی سیاسی جماعت کی تائید کی پابند نہیں ہے۔ جمعیۃ علماء کے قائدین کے لئے قوم و ملت کا مفاد مقدم ہے۔ مسلمانوں کی دینی، ملی، سماجی، سیاسی، تعلیمی اور اقتصادی ترقی جمعیۃ علماء کا نصب العین ہے۔ انہوں نے کہا کہ نہ کوئی طاقت جمعیۃ علماء کو خوفزدہ کرسکتی ہے اور نہ ہی کوئی لالچ جمعیۃ علماء کے قائدین کو اپنے راستہ سے ہٹا سکتی ہے۔
حافظ پیر خلیق احمد صابر صاحب نے مزید کہا کہ جب جمعیۃ نے طے کیا تھا کہ ریاست میں حکومت کو بدلنا ہے تو ہم نے حکومت کو بدل کر دکھایا۔ اب جمعیۃ نے طے کیا ہے کہ حکومت سے ہمارے مطالبات منوانے ہیں اور اس مقصد کے تحت ہم نے جدوجہد شروع کی ہے۔ اس ضمن میں ایک زبردست جلسہ عام اپریل میں حیدرآباد میں منعقد ہوگا، جس میں لاکھوں مسلمان شرکت کرتے ہوئے اپنی طاقت کا مظاہرہ کریں گے اور اپنے مطالبات منوانے کے لیے حکومت پر دباؤ ڈالیں گے۔
جنرل سکریٹری ریاستی جمعیۃ علماء نے کہا کہ اس مرکزی اجلاس عام سے پہلے تمام اضلاع میں اجلاس منعقد کیے جائیں گے اور عوام خصوصاً اقلیتوں میں شعور بیدار کیا جائے گا۔ حافظ پیر خلیق احمد صابر نے کہا کہ حکومت سے ہمارے مطالبات میں اہم مطالبات یہ ہیں کہ مسلمانوں کو آبادی کے تناسب کے اعتبار سے اسمبلی، کونسل، ادارہ جات مقامی اور نامزد عہدوں پر نمائندگی دی جائے۔
ہیٹ کرائم اور ہیٹ تقاریر کے خلاف اسمبلی میں بل پیش کیا جائے اور کسی بھی مذہب یا مذہبی پیشوا کے خلاف بیان بازی، بکواس اور گستاخی کے خلاف سخت قانون بنایا جائے۔ اوقافی جائیدادوں کا تحفظ اور اس کی صیانت کی جائے۔ مذہبی عبادتگاہوں سے متعلق 1991 عبادت گاہ قانون کے طرز پر اسمبلی میں بھی قانون سازی کی جائے۔
قبل ازیں، جنرل سکریٹری حافظ پیر خلیق احمد صابر نے پروجیکٹر کے ذریعے جمعیۃ علماء کے تمام شعبہ جات کا تعارف، کارکردگی اور طریقہ کار کو تفصیل سے بیان کیا اور جمعیۃ کی رکنیت سازی کی اہمیت اور ضرورت پر بھی روشنی ڈالی۔ مولانا لئیق اللہ قاسمی، صدر جمعیۃ علماء ضلع پداپلی نے اجلاس کے آغاز میں اجلاس کے اغراض و مقاصد کو بیان کرتے ہوئے تمام شرکاء کا خیرمقدم کیا اور ان کی آمد پر شکریہ ادا کیا۔
اجلاس کا آغاز حافظ وقاری شاہد کی قراءت کلام پاک سے ہوا، نعت محمد شریف پیش کی گئی، اور جنرل سکریٹری جمعیۃ علماء ضلع پداپلی، مفتی محمد استقام الدین قاسمی نے اجلاس کی کارروائی چلائی۔ مولانا جمیل احمد صاحب نے تمام علماء و حفاظ کا شکریہ ادا کیا۔ آخر میں حضرت مفتی محمد مشکور احمد صاحب قاسمی، صدر جمعیۃ علماء ضلع منچریال کی دعا پر اجلاس کا اختتام عمل میں آیا۔
اجلاس میں حضرت مفتی محمد صادق حسین صاحب قاسمی، جنرل سکریٹری جمعیۃ علماء ضلع کریم نگر، حضرت مولانا عمر فاروق صاحب قاسمی، صدر سٹی جمعیۃ علماء ضلع کریم نگر، حافظ سید رضوان صاحب، قاضی منقبت شاہ خان صاحب، حافظ عبدالمجید اشتیاق، مولانا منور صاحب، مولانا عبد الرحمن شاکر صاحب، مفتی امتیاز، حافظ عبد الکریم صاحب، حافظ امجد صاحب، مفتی مجاہد، مولانا توصیف، حافظ امین صاحب کے علاوہ دیگر ذمہ داران اور کارکنان کی کثیر تعداد موجود تھی۔
ہمیں فالو کریں
