عآپ کے سابق وزیر ستیندر جین کی مشکلات میں اضافہ، سی بی آئی کو مقدمہ چلانے کی ملی اجازت

دہلی اسمبلی انتخاب کی تیاریوں میں مصروف عام آدمی پارٹی کے لیے ایک بُری خبر نکل کر سامنے آ رہی ہے۔ دہلی کے سابق وزیر صحت اور عآپ کے سینئر لیڈر ستیندر جین کے خلاف آمدنی سے زیادہ اثاثہ جمع کرنے کے معاملے میں مقدمہ چلانے کے لیے سی بی آئی کو منظوری مل گئی ہے۔ سی بی آئی نے الزام لگایا ہے کہ ستیندر جین نے سرکاری ملازم کے طور پر کام کرتے ہوئے 14 فروری 2015 سے 31 مئی 2017 کے درمیان تقریباً 1.62 کروڑ روپے کی آمدنی سے غیر متناسب اثاثے جمع کیے ہیں۔ واضح ہو کہ ستیندر جین کے خلاف سی بی آئی نے 4 جنوری کو ایک ضمنی چارج شیٹ داخل کیا تھا۔ راؤز ایونیو کورٹ نے اس معاملے کو غور کے لیے درج کر لیا ہے۔

واضح ہو کہ دہلی اسمبلی انتخاب میں اس بار عام آدمی پارٹی نے شکور بستی سے ستیند جین کو اپنا امیدوار بنایا ہے۔ ستیندر جین کا مقابلہ بی جے پی کے کرنیل سنگھ اور کانگریس کے ستیش لوتھرا سے ہے۔ شکور بستی حلقہ اسمبلی پر 2013 سے ہی عام آدمی پارٹی کا قبضہ ہے۔ شکور بستی سے تینوں دفعہ ستیندر جین نے جیت درج کی ہے۔ ایسے میں اس دفعہ کے اسمبلی انتخاب میں بھی ستیندر جین کی جیت کی امید کی جا رہی ہے۔ لیکن اس دفعہ ان کے لیے راہ آسان نہیں ہے کیونکہ ان کے مقابلے میں کانگریس اور بی جے پی نے جو امیدوار اتارے ہیں وہ ان کو سخت مقابلہ دینے کی قوت رکھتے ہیں۔

قابل ذکر ہے کہ دہلی کے راؤز ایونیو کورٹ نے اکتوبر 2024 میں سابق وزیر صحت ستیندر جین کو ضمانت دی تھی۔ انہیں منی لانڈرنگ سے منسلک ایک معاملے میں انفورسمنٹ ڈائریکٹوریٹ (ای ڈی) نے مئی 2022 میں گرفتار کیا تھا۔ حالانکہ ای ڈی نے عدالت میں ان کی ضمانت کی مخالفت کی تھی اور کہا تھا کہ اگر انہیں ضمانت دی گئی تو وہ گواہوں کو متاثر کر سکتے ہیں۔