مہاراشٹر: مہایوتی میں پھوٹ کے آثار واضح، این سی پی نے ایم سی ڈی انتخاب تنہا لڑنے کا دیا اشارہ

مہاراشٹر کی سیاست میں ہلچل کے آثار دکھائی دے رہے ہیں۔ جیسے جیسے ایم سی ڈی انتخاب قریب آ رہے ہیں، مہایوتی میں ٹوٹ پھوٹ کے اشارے ملنے شروع ہو گئے ہیں۔ مہایوتی میں شامل بی جے پی، این سی پی (اجیت پوار گروپ) اور شیوسینا (شندے گروپ) کے لیڈران لگاتار کچھ ایسے بیانات دے رہے ہیں، جو ظاہر کرتے ہیں کہ مہایوتی میں سب کچھ ٹھیک نہیں ہے۔ اب این سی پی نے اپنے دم پر ایم سی ڈی انتخاب لڑنے کے امکانات کا اشارہ دے دیا ہے۔

دراصل ہفتہ کے روز این سی پی لیڈر نواب ملک نے ایک میٹنگ میں ’خود انحصاری‘ کا نعرہ دیتے ہوئے میونسپل کارپوریشن انتخاب تنہا لڑنے کا مطالبہ کیا ہے۔ نواب ملک کے اس مطالبہ کے بعد ہی قیاس لگائے جا رہے ہیں کہ اجیت پوار مہایوتی سے الگ ہو کر انتخاب لڑ سکتے ہیں۔ این سی پی نے ہفتہ کے روز ممبئی کے ماٹنگا میں میٹنگ منعقد کی جس میں اس سلسلے میں تبادلہ خیال ہوا۔ اس میٹنگ میں نواب ملک، رکن اسمبلی ثنا ملک اور سدھارتھ کامبلے سمیت کئی عہدیدار اور پارٹی کارکنان موجود تھے۔

نواب ملک نے اس میٹنگ میں کہا کہ این سی پی کی تشکیل کے بعد سے پارٹی ممبئی میں 14 سے زیادہ میونسپل خادموں کا انتخاب نہیں جیت پائی ہے۔ انھوں نے کہا کہ ’’یہ ہمارے لیے ایک داغ ہے جسے مٹانے کے لیے ہمیں اپنے بوتھ سطح پر مضبوطی سے کام کرنا ہوگا اور تنہا انتخاب لڑنا ہوگا۔‘‘ اتنا ہی نہیں، نواب ملک نے زور دے کر کہا کہ ’’جب تک کسی پارٹی کے پاس اپنی طاقت نہیں ہوتی، تب تک ساتھی پارٹی بھی ساتھ نہیں دیتے۔‘‘ انھوں نے این سی پی کارکنان کو خود انحصاری بننے اور تنہا انتخاب لڑنے کی ہمت اور تیاری کرنے کے لیے کہا۔ نواب ملک نے کہا کہ ’’بی جے پی ہو یا کوئی اور پارٹی، سیاست میں کوئی مستقل ساتھی نہیں ہوتا۔ طاقتور بننے پر ہی دوسروں کی نظریں آپ پر ٹکتی ہیں۔ اگر ہمارے پاس طاقت ہے تو ہم ممبئی مہانگر پالیکا میں اپنا اثر خود بنا سکتے ہیں۔‘‘