حیدرآباد میں فارمولا ای ریس کے معاملے میں ای ڈی (انفورسمنٹ ڈائریکٹوریٹ) نے تلنگانہ راشٹرا سمیتی کے کار گزار صدر اور سابق وزیر کے ٹی راما راو کو نوٹس جاری کی ہے ۔ ای ڈی نے انہیں 7 جنوری کو تحقیقات کے لیے پیش ہونے کی ہدایت دی ہے۔
اسی کیس میں سینئر آئی اے ایس افسر اروند کمار اور حیدرآباد میٹروپولیٹن ڈیولپمنٹ اتھارٹی (ایچ ایم ڈی اے) کے سابق چیف انجینئر بی ایل این ریڈی کو بھی نوٹس جاری کیے گئے ہیں۔ انہیں 2 اور 3 جنوری کو تحقیقات کے لیے طلب کیا گیا ہے۔
ای ڈی کی تحقیقات اینٹی کرپشن بیورو (اے سی بی) کی جانب سے درج ایف آئی آر کی بنیاد پر کی جا رہی ہیں۔ الزام ہے کہ فارمولا ای ریس کی منصوبہ بندی اور انعقاد کے دوران بے ضابطگیاں اور بدعنوانیاں کی گئی تھیں، جن کی وجہ سے عوامی فنڈز کا غلط استعمال ہوا۔
یہ کیس تلنگانہ حکومت اور متعلقہ محکموں کے لیے ایک حساس معاملہ بن چکا ہے، اور ای ڈی کی تحقیقات سے کئی نئے انکشافات کی توقع کی جا رہی ہے۔ فارمولا ای ریس کو ایک بین الاقوامی ایونٹ کے طور پر پیش کیا گیا تھا، لیکن مبینہ طور پر اس میں مالی بے قاعدگیاں سامنے آئی ہیں۔
یہ تحقیقات ریاستی سیاست میں ہلچل پیدا کر سکتی ہیں، خاص طور پر جب سابق وزیر کے ٹی راما راؤ کو شامل کیا گیا ہے۔ مزید تفصیلات تحقیقات کے بعد واضح ہوں گی۔
