[]
بنگلورو: بھارتیہ جنتا پارٹی (بی جے پی) کے ایم ایل اے بسن گوڑا پاٹل یتنال کے کرناٹک کے وزیر دنیش گنڈو راؤ کی اہلیہ کو ان کی مسلم شناخت کی وجہ سے ان کے گھر کو ‘آدھا پاکستان’ کہنے سے متعلق تبصرے کی وجہ سے نہ صرف ریاستی سیاست میں ایک نیا تنازعہ کھڑا ہوگیا ہے بلکہ ان کے خلاف ایف آئی آر بھی درج کرائی گئی ہے۔
راؤ کی بیوی تبسم راؤ نے یتنال کے تبصرے پر سخت رد عمل ظاہر کیا اور اتوار کو بنگلورو کے سنجے نگر پولیس اسٹیشن میں شکایت درج کرائی۔ شکایت درج کروانے کے بعد مسز راؤ نے نامہ نگاروں کو بتایا کہ وہ سیاست میں نہیں ہیں اور یتنال سے ان کی کوئی واقفیت نہیں ہے۔
انہوں نے مذہبی حدود سے ماورا سماجی کام کے لیے اپنی وابستگی پر زور دیا، جو وسیع تر کمیونٹی کی فلاح و بہبود کے لیے ان کی وابستگی کی عکاسی کرتا ہے۔ یتنال کی سیاست کو تفرقہ انگیز قرار دیتے ہوئے، مسز راؤ نے مشورہ دیا کہ اس طرح کے ہتھکنڈے ترقی جیسے اہم مسائل سے توجہ ہٹاتے ہیں، جسے انتخابی مہم کے مرکز میں ہونا چاہیے۔انہوں نے کہا،“میں سیاست میں نہیں ہوں، مجھے یہ بھی نہیں معلوم کہ بسون گوڑا پاٹل یتنال کون ہیں۔
میں مذہب سے ہٹ کر سماجی کاموں میں شامل ہوں۔ انہوں نے مجھ پر ایسا بیان کیوں دیا؟ کیا کسی کی بیوی اور بچوں کے بارے میں بات کرنا بی جے پی کی سیاست ہے؟ ” یتنال کی سیاست تفرقہ انگیز ہے اور بی جے پی کے پاس الیکشن لڑنے کے لیے ترقی کا کوئی مدا نہیں ہے۔” راؤ نے سیاسی بحثوں میں گھسیٹے جانے پر اپنا اعتراض ظاہر کیا، خاص طور پر جب اس میں ان کی مذہبی شناخت کی بنیاد پر ذاتی حملے شامل ہوں۔
انہوں نے زور دے کر کہا کہ دنیش گنڈو راؤ جیسے سیاست دانوں پر بحث کرنا فطری ہوسکتا ہے لیکن لوگوں کے خاندانوں اور ذاتی زندگیوں کو گفتگو میں لانا نامناسب ہے۔انہوں نے ہندوستان میں سیاسی مباحثوں میں مسلمانوں کو بار بار نشانہ بنائے جانے پر اپنی ناراضگی کا اظہار کرتے ہوئے اس رجحان کو بی جے پی کی سیاسی حکمت عملی کا عکاس قرار دیا، جسے وہ تفرقہ انگیز اور امتیازی سمجھتی ہیں۔
انہوں نے یتنال سے ان کے تبصروں کے لیے معافی مانگنے کا مطالبہ کرتے ہوئے کہا کہ وہ انہیں یا ان کے تبصروں کے پیچھے کی وجوہات کو نہیں جانتی ہیں۔انہوں نے کہا کہ یتنال نے میرے شوہر کو نشانہ بناتے ہوئے غیر ضروری طور پر میرا نام اس میں گھسیٹا ہے۔ ہمیں باہمی احترام اور شائستگی کے ذریعہ اخلاقی معیارات کو برقرار رکھنے کی ضرورت ہے۔ وہ کسی شخص کے مذہب کو درمیان لاتے ہیں، جوان کا ذاتی معاملہ ہے۔
یتنال کے تبصرے قومی تفتیشی ایجنسی (این آئی اے) کے ذریعہ یکم مارچ کو رامیشورم بم دھماکہ کے سلسلہ میں شیواموگہ کے بی جے پی لیڈر سائی پرکاش، جو ایک گواہ بھی تھے، کوطلب کرنے کے بعد گنڈو راؤ کے رد عمل کے جواب میں آیاتھا۔
ہمیں فالو کریں
