[]
حیدرآباد: آندھراپردیش کے وشاکھاپٹنم کے ساحل پر بنایاگیا فلوٹنگ بریج افتتاح کے دوسرے دن ہی ٹوٹ کر بہہ گیا۔
ایک کروڑ60لاکھ روپئے کی لاگت سے بنائے گئے اس بریج کا افتتاح اتوار کو وائی ایس آرکانگریس کے رکن راجیہ سبھا وائی وی سباریڈی اور وزیرآئی ٹی امرناتھ گوڑنے کیا تھا۔
اس بریج کے تین ٹکڑے ہو گئے ہیں۔ فلوٹنگ بریج کے افتتاح کے دوسرے ہی دن ٹوٹنے پر اس پر بڑے پیمانے پر تنقید کی جارہی ہیں۔
اس بریج میں جانے کیلئے بالغ افراد کیلئے 100روپئے اور بچوں کیلئے 70روپئے ٹکٹ رکھاگیا تھا۔اس واقعہ پر سیاحوں نے تشویش کا اظہار کیا۔
ان کا کہنا ہے کہ حکومت کو عوام کی زندگیوں سے جڑے اس معاملے میں لاپرواہی نہیں کرنی چاہیے۔ بتایا جاتا ہے کہ اس بریج کے ٹوٹنے کے وقت اس میں سیاحوں کی عدم موجودگی سے ایک بڑا حادثہ ٹل گیا ۔
اس دوران عوام کو اس پل کی طرف جانے سے روکنے کے لیے حفاظتی انتظامات کیے گئے ہیں۔ بریج مینجمنٹ کمپنی نے کہا کہ پراجیکٹ منیجرس آخری ٹوٹے ہوئے حصے کو لانے اور اس کی مرمت میں مصروف ہیں۔
بریج پر لگائے گئے پلاسٹک کے بولٹ کے پرزے لہروں کے اُٹھنے کی وجہ سے ٹوٹ گئے ہیں۔
ہمیں فالو کریں
