کانگریس کو ’ڈونیٹ فار دیش‘ مہم کے ذریعے اب تک 2 کروڑ 81 لاکھ روپے حاصل، 20 ہزار سے زیادہ ’سائبر حملے‘

نئی دہلی: آئندہ لوک سبھا انتخابات سے پہلے کانگریس کے ذریعے دو دن پہلے 18 دسمبر کو آن لائن چندہ جمع کرنے کے لیے ‘ڈونیٹ فار دیش’ کے نام سے شروع کی گئی کراؤڈ فنڈنگ ​​مہم کے دوران اب تک 113713 افراد آن لائن طریقہ سے 2 کروڑ 81 لاکھ روپے عطیہ کر چکے ہیں۔ عطیہ کرنے والوں میں سے 80 فیصد نے یو پی آئی ڈیجیٹل موڈ استعمال کیا ہے۔ خیال رہے کہ کانگریس نے یہ مہم 28 دسمبر کو اپنے 138ویں یوم تاسیس سے 10 دن پہلے شروع کی ہے،

حیران کن بات یہ ہے کہ کانگریس کی طرف سے شروع کی گئی اس مہم پر دو دنوں کے اندر ہزاروں سائبر حملے ہو چکے ہیں۔ پارٹی ذرائع کا کہنا ہے کہ اس عرصے میں 20 ہزار 400 سائبر حملے ہوئے ہیں۔ ان میں 1340 مرتبہ ڈیٹا چوری کرنے کی کوشش کی گئی۔ ایسے زیادہ تر حملے بیرون ملک سے کئے گئے۔

پارٹی ذرائع کے مطابق کانگریس کے قومی صدر ملکارجن کھڑگے اور سابق صدر راہل گاندھی سمیت 32 لوگوں نے فنڈ میں ایک لاکھ روپے سے زیادہ کا عطیہ دیا ہے۔ اس کے ساتھ ہی 626 لوگوں نے 13 ہزار روپے کا عطیہ دیا ہے۔ عطیہ کی ویب سائٹ پر ایک کروڑ 12 لاکھ وزٹ ریکارڈ کیے گئے۔

ذرائع کا کہنا ہے کہ آنے والے دنوں میں کانگریس اپنی میٹنگوں میں کیو آر کوڈ لگا کر چندہ مانگے گی۔ اس کے ساتھ تجارتی سامان بھی جاری کیا جائے گا جس کے تحت لوگ پیسوں کے بدلے راہل گاندھی کے دستخط والے سامان خرید سکتے ہیں۔ جن پانچ ریاستوں سے پہلے دو دنوں میں سب سے زیادہ عطیات موصول ہوئے ان میں مہاراشٹر سے 56 لاکھ، راجستھان سے 26 لاکھ، دہلی سے 20 لاکھ، یوپی سے 19 لاکھ اور کرناٹک سے 18 لاکھ عطیات شامل ہیں۔