[]
نئی دہلی: کانگریس نے انتخابی بانڈز کے ذریعے سیاسی پارٹیوں کو ملنے والے عطیات کو غیر شفاف قرار دیتے ہوئے کہا ہے کہ پارٹی اس کی مسلسل مخالفت کرتی رہی ہے اور اقتدار میں آنے کے بعد بدعنوانی کو بڑھاوا دینے والے اس غیر شفاف نظام کو ختم کردے گی۔
کانگریس کے ترجمان پون کھیڑا نے جمعہ کو یہاں پارٹی ہیڈکوارٹر میں ایک پریس کانفرنس میں کہا کہ انتخابی بانڈز کے ذریعے پارٹیوں کو چندہ دینے کا پہلے کا شفاف نظام اب ختم ہو گیا ہے۔
نئے نظام کے تحت اب سیاسی جماعتوں کو کسی بھی کمپنی، شخص یا تنظیم کی جانب سے دیے جانے والے عطیات کی حد ختم کردی گئی ہے۔ کس کمپنی کی طرف سے کس پارٹی کو دی گئی رقم کے بارے میں کوئی انکوائری نہیں کی جا سکتی۔
انہوں نے کہا کہ انتخابی بانڈز کے ذریعے دو مالی سالوں میں ایک پارٹی کے کھاتے میں 5,200 کروڑ روپے آئے۔ یہ رقم کہاں سے آئی اور کس نے دی، اس کا کہیں کوئی ریکارڈ نہیں ہے۔
اس بارے میں کوئی پوچھنے والا نہیں۔ یہ سب بی جے پی حکومت کی من مانی کی وجہ سے ہوا۔ اس سے پہلے کمپنیاں کس پارٹی کو دی جانے والی رقم کا انکشاف کر سکتی تھیں لیکن اب اس نظام کو ہٹا دیا گیا ہے اور پارٹیوں کو الیکٹورل بانڈز سے ملنے والے عطیات کو مبہم کر دیا گیا ہے۔
ترجمان نے کہا کہ انتخابی بانڈز کی وجہ سے انتخابی فنڈنگ غیر شفاف ہو گئی ہے۔ الیکشن کمیشن، سپریم کورٹ، آر بی آئی سبھی کو اس بانڈ پر اعتراض تھا۔ لیکن اسے منی بل کی طرح پاس کیا گیا ہے۔ اس ایک منی بل کے ذریعے بی جے پی نے ایم ایل اے کو خریدنے اور حکومتوں کو گرانے کا کام کیا ہے۔
انتخابی بانڈز کے سلسلے میں پہلے کے انتظامات کا حوالہ دیتے ہوئے مسٹر کھیڑا نے کہاکہ “پہلے کوئی کمپنی تین سال تک اپنے خالص منافع کا 7.5 فیصد سے زیادہ عطیہ نہیں کر سکتی تھی لیکن اب بی جے پی حکومت نے اس حد کو ہٹا دیا ہے۔ اب کسی کمپنی کو یہ بتانے کی ضرورت نہیں کہ کتنی رقم کس کو دی گئی۔ یہ بہت مبہم ہے۔
جب اتنی بڑی بے نامی رقم کسی پارٹی کے کھاتے میں آتی ہے تو یہ واضح ہو جاتا ہے کہ کالے دھن کو سفید میں کیسے تبدیل کیا جاتا ہے۔ اب کوئی بھی شخص، تنظیم یا کمپنی بی جے پی کے کھاتے میں کوئی بھی رقم ڈال سکتا ہے۔
اس حوالے سے کوئی چھاپہ نہیں مارا جائے گا۔ منی لانڈرنگ کے اس مبہم نظام کی وجہ سے ای ڈی، سی بی آئی یا محکمہ انکم ٹیکس اب چھاپے نہیں مار سکتے۔ اس نظام میں کرپشن کو مکمل آزادی دی گئی ہے۔
انہوں نے وزیر اعظم نریندر مودی اور وزیر داخلہ امیت شاہ سے سوال کیاکہ “آپ نے انتخابی بانڈز کے تحت کارپوریٹ عطیات کی حد کو ہٹا دیا۔ کانگریس اس انتخابی فنڈنگ کا شفاف نظام چاہتی ہے۔
کانگریس چاہتی ہے کہ انتخابی فنڈنگ کا یہ مبہم نظام ختم ہو۔ پارٹی نے یہ بات اپنے 2019 کے انتخابی منشور میں بھی کہی ہے اور مستقبل میں بھی اسی اصول پر کام کرے گی۔ پارٹی نے رائے پور کنونشن میں بھی یہی بات کہی ہے۔
