برطانیہ میں ایران کے سفارت خانے کی جانب سے سوشل میڈیا پر کیا گیا ایک پیغام عالمی سطح پر ہلچل مچا رہا ہے۔ اطلاعات کے مطابق سفارت خانے نے اپنے آفیشل ٹیلیگرام چینل پر “جان فدا” نامی مہم شروع کی، جس میں بیرونِ ملک مقیم ایرانی شہریوں کو وطن کے لیے “قربانی” دینے اور ضرورت پڑنے پر “شہادت” اختیار کرنے کی ترغیب دی گئی۔
برطانوی میڈیا کے مطابق اس پیغام میں ایرانی نژاد افراد سے اپیل کی گئی کہ وہ اپنے ملک کے وقار کے لیے لڑیں اور دشمن کے سامنے جھکنے کے بجائے جان قربان کرنے کو ترجیح دیں۔ اس پر برطانیہ کے حکام اور سیاسی رہنماؤں نے سخت تشویش کا اظہار کیا ہے اور اسے خطرناک قرار دیا ہے۔
برطانوی وزارت خارجہ (FCDO) نے ایران کے سفیر سید علی موسوی کو طلب کر کے اس معاملے پر ناراضگی ظاہر کی۔ حکام کا کہنا ہے کہ ایسے پیغامات اشتعال انگیزی کا سبب بن سکتے ہیں اور ملک میں امن و امان کے لیے خطرہ بن سکتے ہیں، جس کے پیش نظر سکیورٹی ایجنسیاں صورتحال پر نظر رکھے ہوئے ہیں۔
دوسری جانب ایرانی سفارت خانے نے ان الزامات کو مسترد کرتے ہوئے کہا کہ ان کا مقصد صرف بیرونِ ملک ایرانیوں میں حب الوطنی کو فروغ دینا ہے، نہ کہ تشدد کو ہوا دینا۔ تاہم بڑھتی ہوئی عالمی کشیدگی کے درمیان یہ معاملہ مزید سیاسی تنازع کو جنم دیتا دکھائی دے رہا ہے۔
