[]
جودھپور: چیف منسٹر اشوک گہلو ت نے جودھپور میں پیر کے دن بی جے پی کی سینئر قائد سوریہ کانتا ویاس سے ان کے بنگلہ میں ملاقات کرکے سب کو حیرت زدہ کردیا۔
سردار پورہ حلقہ میں جہاں سے وہ اسمبلی الیکشن لڑرہے ہیں اپنی 2 روزہ مہم سمیٹتے ہوئے وہ فصیل بند شہر میں 12:30 بجے کے آس پاس ویاس کے بنگلہ میں پہنچ گئے اور وہاں تقریباً 15منٹ رہے۔ ویاس‘ حلقہ سورساگر سے 3 مرتبہ رکن اسمبلی رہیں۔
منگل کی صبح میڈیا سے بات چیت میں اشوک گہلوت نے اسے جودھپور کے عوام کی خدمت کے اعتراف کے طورپر خیرسگالی ملاقات قراردیا۔ انہوں نے کہا کہ وہ عرصہ سے جودھپور کی خدمت کررہی ہیں۔
انہوں نے لمبی اننگ کھیلی اسی لئے میں ان کے احترام میں ان کے بنگلہ پر گیا تھا۔ بی جے پی نے 25 نومبر کے اسمبلی الیکشن کے امیدواروں کی اپنی فہرست سے 85 سالہ ویاس کا نام ہٹادیا۔
پارٹی قائدین کے بموجب 85 سال کی عمر کی وجہ سے انہیں پھر ٹکٹ نہیں دیا گیا تاہم اشوک گہلوت کا دعویٰ ہے کہ ویاس کو ٹکٹ اس لئے نہیں دیا گیا کہ انہوں نے میرے کام کی ستائش کی تھی۔
انہوں نے کہا کہ بی جے پی میں 85 سال کی عمر کے دیگر قائدین موجود ہیں جنہیں ٹکٹ ملا۔
