[]
ذرائع کا کہنا ہے کہ ڈی کے شیوکمار بی جے پی اور جے ڈی ایس کے 20 سے زیادہ ارکان اسمبلی سے رابطہ میں ہیں اور بہت جلد یہ لیڈر بھی کانگریس میں شامل ہو سکتے ہیں!
بنگلورو: کرناٹک میں انتخابی شکست کے بعد بی جے پی اور جے ڈی ایس کو ایک بار پھر بڑا جھٹکا لگا ہے۔ جمعہ کو بنگلورو میں منعقدہ ایک پروگرام میں نائب وزیر اعلیٰ ڈی کے شیوکمار کی موجودگی میں دونوں پارٹیوں کے 15 سے زیادہ سرکردہ لیڈران اور سابق کونسلروں نے کانگریس میں شمولیت اختیار کر لی۔ اس تقریب کا اہتمام کانگریس دفتر کے ’بھارت جوڑو آڈیٹوریم‘ میں کیا گیا تھا۔
کانگریس میں شامل ہونے والے اہم لیڈران میں سابق ڈپٹی میئر ایل سرینواس، پرساد بابو اور سابق تعلقہ پنچایت رکن انجین اپا شامل تھے۔ شیوکمار نے انہیں کانگریس کا پرچم دیا اور پارٹی میں ان کا استقبال کیا۔ کانگریس میں شامل ہونے کے بعد سرینواس نے کہا کہ انہوں نے 33 سال تک بی جے پی کے لیے کام کیا لیکن پارٹی میں عزت نہیں ملی اور اب وہ کانگریس کو مضبوط کریں گے۔
اس موقع پر بات کرتے ہوئے ڈی کے شیوکمار نے کہا کہ بی جے پی اور جے ڈی ایس کے رہنما پدمنابھ نگر حلقہ سے، جنہوں نے بنگلورو میونسپل کارپوریشن میں اقتدار حاصل کرنے کے پیچھے ایک بڑی طاقت کے طور پر کام کیا، اب کانگریس کے ساتھ ہیں۔ بی جے پی لیڈروں نے ان کے ساتھ اچھا سلوک نہیں کیا اور اب وہ ہمارے دروازے پر دستک دے رہے ہیں۔
شیوکمار نے کھل کر کہا کہ وہ پارٹی کو مضبوط کرنے کے لیے اقدامات کریں گے۔ وہ آنے والے بروہت بنگلورو میونسپل کارپوریشن (بی بی ایم پی) کے انتخابات اور لوک سبھا انتخابات جیتنے کے لیے کام کر رہے ہیں۔ بنگلورو کے یشونتھ پور اور آر آر نگر حلقوں سے بی جے پی اور جے ڈی ایس لیڈروں کو شامل کرنے کے بعد کانگریس کی طرف سے یہ تیسرا بڑا آپریشن ہے۔ ذرائع کا کہنا ہے کہ ڈی کے شیوکمار بی جے پی اور جے ڈی ایس کے 20 سے زیادہ ایم ایل اے سے بات کر رہے ہیں اور بہت جلد یہ لیڈر کانگریس میں شامل ہو سکتے ہیں۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
;
