[]
کولمبو: کرکٹ کے میدان پر ہندوستان اور پاکستان کے کھلاڑی ایک دوسرے کو شکست دینے کیلئے جان کی بازی لگاتے ہیں لیکن میدان کے باہر ان کے درمیان دوستی دیکھنے کے لائق ہے۔
ایشیا کپ میں پاکستان اور ہندوستان کی ٹیمیں اس وقت ایک دوسرے کے خلاف کھیل رہی ہیں۔ ایشیا کپ 2023 کے سوپر 4 میں پاکستان اور ہندوستان کا میاچ پہلے دن بارش کی وجہ سے نامکمل رہا۔
پہلے دن کا کھیل منسوخ ہونے کے بعد جب کھلاڑی اپنے اپنے ہوٹلوں کی طرف جارہے تھے تو پاکستان کے فاسٹ بولر شاہین آفریدی نے ہندوستانی بولر جسپریت بمراہ کو باپ بننے پر مبارکباد دی۔
شاہین نے نہ صرف بمراہ کو مبارکباد دی بلکہ بمرا کو ایک خوبصورت تحفہ بھی دیا۔ پاکستان کرکٹ بورڈ نے اپنے سوشل میڈیا پر ایک ویڈیو پوسٹ کی ہے جس میں شاہین بمراہ سے ملتے ہیں اور کہتے ہیں ’بھائی، آپ کو بہت بہت مبارک ہو، آپ کو بیٹا مبارک، اللہ انہیں ہمیشہ خوش رکھے اور نیا بمرا بنے۔
شاہین کی جانب سے مبارکباد اور تحفہ دینے پر جسپریت بمراہ نے بھی پاکستانی بولر کا شکریہ ادا کیا اور ان کیلئے بھی نیک تمناؤں کا اظہار کیا۔
