مہر خبررساں ایجنسی، بین الاقوامی ڈیسک: یوکرین کے صدر ولادیمیر زیلنسکی کی جانب سے امریکہ کے ساتھ معدنی وسائل کے معاہدے کے ابتدائی مسودے پر دستخط سے انکار پر وائٹ ہاؤس نے برہمی کا اظہار کیا ہے۔
امریکی صدر ڈونلڈ ٹرمپ نے کہا کہ یوکرین کو چاہیے کہ وہ 500 بلین ڈالر کا اہم خام مال امریکہ کو اس امداد کی ادائیگی کے طور پر دے جو کیف کو جو بائیڈن انتظامیہ سے پہلے ملی تھی۔
تاہم، زیلنسکی نے کہا کہ واشنگٹن نے ان کے ملک کو صرف 67 بلین ڈالر کا اسلحہ اور 31.5 بلین ڈالر براہ راست بجٹ میں دیا ہے، اور وہ بائیڈن کی طرف سے فراہم کردہ امداد کو قرض نہیں سمجھتے۔
یوکرین پر دباو کے امریکی حربے
بلاشبہ، امریکہ کے لئے 500 بلین ڈالر کا حصول یوکرین کے کمیاب معدنی ذخائر پر قبضے کے لئے دباؤ کے بغیر ممکن نہیں۔
ذرائع نے رائٹرز کو بتایا کہ امریکی مذاکرات کاروں نے یوکرین کو بتایا کہ اگر کان کنی کے معاہدے پر دستخط نہیں کیے گئے تو امریکہ یوکرین کی سٹار لنک انٹرنیٹ تک رسائی کاٹ سکتا ہے۔ جب کہ یہ سیٹلائٹ انٹرنیٹ سروس یوکرین کے لیے بہت اہم ہے۔
اٹلانٹک کونسل کی سینیئر رکن میلنڈا ہیرنگ کا خیال ہے کہ یوکرین کی ڈرون کارروائیوں کے لیے سٹار لنک انٹرنیٹ ضروری ہے، جو کہ ملک کی فوجی حکمت عملی کی بنیاد ہے، اور سٹار لنک کے کھو جانے سے جنگی کھیل بدل جائے گا۔
یوکرین کے پاس میری ٹائم اور سرویلنس ڈرونز سے لے کر طویل فاصلے تک مار کرنے والے ڈرونز کی ایک وسیع کھیپ موجود ہے جو سٹار لنک انٹرنیٹ پر انحصار کرتی ہے۔
بالآخر یوکرین اور امریکہ کے درمیان ہونے والے مذاکرات اسی دباو کا نتیجہ ہیں۔ یوکرین کے نائب وزیر اعظم نے حال ہی میں اعلان کیا تھا کہ ان کا ملک اور امریکہ معدنیات سے متعلق ایک معاہدے پر بات چیت کے “آخری مراحل” میں ہیں جو جنگ کے خاتمے میں کلیدی کردار ادا کرے گا۔
امریکی قومی سلامتی کے مشیر مائیک والٹز نے اس مشترکہ سرمایہ کاری کے معاہدے کو “بہترین سلامتی کی ضمانت قرار دیا جس کی یوکرین امید کر سکتا ہے۔
ادھر ٹرمپ نے الٹی میٹم جاری کیا ہے کہ اگر زیلنسکی تعاون نہیں کرتے ہیں تو وہ ماسکو کے ساتھ امن معاہدے کی طرف بڑھ سکتے ہیں۔
یوکرین کے پاس کون سی اہم اور اسٹریٹجک معدنیات ہیں؟
2022 میں یوکرین کے ماہرین ارضیات کی ایسوسی ایشن کی سربراہ حنا لیونتسیوا کے شائع کردہ ایک مضمون کے مطابق، اس ملک میں دنیا کے تقریباً 5 فیصد معدنی وسائل موجود ہیں۔ البتہ، روس نے یوکرین کی تقریباً 18% زمین پر قبضہ کر رکھا ہے، اب ان میں سے کچھ ذخائر ماسکو کے کنٹرول میں ہیں۔
یوکرین کی معدنیات کا تخمینہ جنگ سے پہلے 11 ٹریلین ڈالر سے زیادہ تھا، ان میں ایسے کمیاب معدنی عناصر شامل ہیں جو مختلف صنعتوں میں استعمال ہوتے ہیں، جن میں موبائل فون، الیکٹرک کاریں، میزائل سسٹم، الیکٹرانک آلات، قابل تجدید توانائی، دفاعی صنعتیں اور صحت شامل ہیں۔
یوکرین کے اعداد و شمار کے مطابق، ملک میں 34 میں سے 22 معدنیات کے ذخائر ہیں جنہیں یورپی یونین نے اہم تسلیم کیا ہے، جن میں لینتھینم، سیریم، نیوڈیمیم، ایربیئم اور یٹریئم جیسی نایاب دھاتیں شامل ہیں۔
ذیل میں کچھ اہم ترین معدنی وسائل کا ذکر کیا گیا ہے:
1۔ ٹائٹینیم فوجی اور ایرو اسپیس صنعتوں کے لیے ایک اہم عنصر۔
اندازوں سے پتہ چلتا ہے کہ یوکرین دنیا میں ٹائٹینیم کے ذخائر کا چوتھا سب سے بڑا ملک ہے، جس نے یورپی کمیشن کی تحقیق کے مطابق 2019 میں عالمی پیداوار کا تقریباً 7% فراہم کیا۔ یہ ہلکی لیکن گرمی سے بچنے والی دھات جنگی طیاروں، میزائلوں، آبدوزوں اور یہاں تک کہ طبی صنعتوں کی تیاری میں استعمال ہوتی ہے۔
امریکہ کا بہت زیادہ انحصار ٹائٹینیم کی درآمد پر ہے اور یوکرین اس انحصار کو کم کرنے کا کلیدی ذریعہ ہو سکتا ہے۔
2. لتھیم اکیسویں صدی کا سفید سونا الیکٹرک گاڑیوں اور توانائی ذخیرہ کرنے کی بڑھتی ہوئی مانگ کے ساتھ، لتھیم سب سے زیادہ اسٹریٹجک خام مال میں سے ایک بن گیا ہے۔ دنیا کے پانچ ہزار ٹن لیتھیم کے ذخائر، جو نیوکلیئر پاور پلانٹس میں کلیدی استعمال کے حامل ہیں، یوکرین کی سرزمین پر پائے جاتے ہیں۔ اگر ٹرمپ لیتھیم کے لیے چین پر امریکہ کا انحصار کم کرنا چاہتے ہیں تو یوکرین ایک پرکشش آپشن ہو سکتا ہے۔
3۔ یورینیم جوہری توانائی کی خود انحصاری کی کلید
یوکرین کے پاس یورینیم کے قابل قدر وسائل موجود ہیں جو ایٹمی صنعت کے لیے بہت اہم ہیں۔ جوہری توانائی کے سب سے بڑے پروڈیوسر کے طور پر، امریکہ کو یورینیم کے مستحکم ذرائع کی ضرورت ہے، اور یوکرین کے ذخائر اس میدان میں دوسرے ممالک پر انحصار کم کرنے میں مدد کرتے ہیں۔
4. گریفائٹ؛ دفاعی صنعتوں کے لیے ضروری مواد
یوکرین دنیا میں گریفائٹ کے سب سے بڑے پروڈیوسر میں سے ایک ہے، دنیا کے گریفائٹ کا پانچواں حصہ، جس کا جوہری پاور پلانٹس میں کلیدی استعمال ہے، یوکرین کی سرزمین پر پایا جاتا ہے۔
یہ مواد لیتھیم آئن بیٹریاں، الیکٹرانک آلات اور فوجی صنعتوں کی تیاری میں استعمال ہوتا ہے۔
الیکٹرک کاروں اور توانائی ذخیرہ کرنے والی بیٹریوں کی تیاری کے لیے گریفائٹ کی بڑھتی ہوئی ضرورت کے باعث، امریکہ یوکرین سے اس کی فراہمی کے لیے کوشاں ہے۔
5۔ کوئلہ اور قدرتی گیس؛ یورپی اور امریکی توانائی کی حفاظت
اگرچہ یوکرین کے پاس اہم فوسل وسائل ہیں، لیکن جنگ اور علاقائی تنازعات نے ان وسائل تک رسائی کو مشکل بنا دیا ہے۔ یوکرین کا کوئلہ اور قدرتی گیس یورپ کی توانائی کی فراہمی اور گیس کی عالمی منڈی پر روس کے اثر و رسوخ کو کم کرنے میں کردار ادا کر سکتی ہے۔ ایک ایسا موضوع جو ٹرمپ انتظامیہ کے لیے پرکشش ہے۔
ٹرمپ کا بنیادی ہدف اور یوکرین کے معدنی وسائل کے استحصال میں حائل رکاوٹیں
مبصرین کے مطابق یوکرین کے معدنی وسائل میں امریکی صدر کی دلچسپی کی بنیادی وجہ “چین کے ساتھ تجارتی مسابقت” ہے۔
دنیا کے مینوفیکچرنگ پلانٹ کے طور پر، یہ ایشیائی سپر پاور اہم معدنیات کی سپلائی چین میں بنیادی کردار ادا کرتی ہے۔ جہاں سے بھی یہ مواد نکالا جاتا ہے، چین ان کی پروسیسنگ اور سپلائی میں اب بھی ایک اسٹریٹجک پوزیشن رکھتا ہے۔
اس وقت دنیا کی معدنیات کو صاف کرنے کی زیادہ تر صلاحیت چین کی ملکیت میں ہے۔
بین الاقوامی توانائی ایجنسی کے مطابق، چین 35% نکل ریفائننگ، 50-70% لیتھیم اور کوبالٹ ریفائننگ، اور تقریباً 90% نایاب زمینی عنصر کی پروسیسنگ کو کنٹرول کرتا ہے اور ان عناصر میں چین کی مہارت خاصی قابل ذکر ہے۔
یو ایس جیولوجیکل سروے کے مطابق امریکہ کو اہم معدنیات کی فراہمی میں سنگین چیلنجوں کا سامنا ہے۔ لہٰذا، یوکرین امریکی اسٹریٹجک صنعتوں کی ضروریات کو پورا کرنے اور معدنیات کے میدان میں چین پر ملک کا انحصار کم کرنے کے علاوہ، واشنگٹن کے لیے ایک قابل قدر متبادل ذریعہ ہو سکتا ہے۔
تاہم سینٹر فار انٹرنیشنل اینڈ اسٹریٹجک اسٹڈیز کے ماہرین کو یقین ہے کہ یوکرین کے ساتھ معاہدے کے امریکی معدنی سلامتی پر نہایت کم اثرات مرتب ہوں گے۔
کیونکہ سرمایہ کاری کی رکاوٹوں کو دیکھتے ہوئے مختصر مدت میں اس کا زیادہ اثر ہوتا نظر نہیں آتا۔
سب سے پہلے، یوکرین میں نایاب زمینوں اور دیگر اسٹریٹجک معدنی مواد کو نکالنے کے لئے ڈیٹا محدود ہے، موجودہ نقشہ سازی سوویت یونین نے 30 سے 60 سال پہلے کی تھی اور پرانے ریسرچ کے طریقوں پر انحصار کیا تھا۔
دوسرا مسئلہ یہ ہے کہ جنگ نے یوکرین کے اہم انفراسٹرکچر کو تباہ کر دیا ہے۔ کان کنی کی صنعت دنیا میں سب سے زیادہ توانائی استعمال کرتی ہے۔ لہذا معدنیات کی تلاش یا پیداوار شروع کرنے کے لیے، توانائی کے بنیادی ڈھانچے کو نمایاں طور پر دوبارہ تعمیر کرنا ہوگا۔
تیسرا یہ کہ کان کنی کمپنیاں سلامتی کے خطرات کی وجہ سے یوکرین میں طویل مدتی سرمایہ کاری سے گریز کرتی ہیں، اور کان کنی ایک طویل مدتی اور سرمایہ دارانہ تجارت ہے جس کے اخراجات کی تلافی میں کافی وقت لگتا ہے۔
