مہر خبررساں ایجنسی کی رپورٹ کے مطابق، ایرانی پارلیمنٹ کے اسپیکر محمد باقر قالیباف نے لبنانی ہم منصب نبیہ بری کے ساتھ ملاقات کے دوران کہا کہ ہم حزبالله کو لبنان کی سلامتی اور قومی طاقت کا حصہ سمجھتے ہیں۔
قالیباف نے لبنان میں شہداء کی تشییع کی عظیم تقریبات اور لبنانی عوام کے غیرمعمولی استقبال پر خوشی کا اظہار کرتے ہوئے کہا کہ میں خوش ہوں کہ آپ سے دوبارہ ملاقات ہوئی اور لبنان میں استحکام، انتخابات کے انعقاد اور مزاحمتی محاذ کی حمایت میں آپ کی کوششوں پر آپ کو مبارکباد دیتا ہوں۔
ایرانی پارلیمانی اسپیکر نے کہا کہ لبنان کی حکومت کا ایران اور بیروت کے درمیان پروازوں پر پابندی کا فیصلہ امریکہ کے اثرات کے تحت کیا گیا ہے اور اس مسئلے کو حل کرنا ضروری ہے۔
قالیباف نے کہا کہ امریکہ اور اسرائیل مشرق وسطی میں عدم استحکام پھیلا رہے ہیں۔ امریکہ اور صہیونی حکومت ایران، لبنان اور شام کے بارے میں خاص منصوبے رکھتے ہیں۔ صہیونیوں نے لبنان کے پانچ علاقوں کو ابھی تک خالی نہیں کیا ہے۔
اس موقع پر لبنانی پارلیمنٹ کے اسپیکر نبیہ بری نے شہداء کی تشییع میں شرکت پر محمد باقر قالیباف اور ایرانی وفد کا شکریہ ادا کرتے ہوئے کہا کہ سید حسن نصرالله کی شہادت کے بعد ایسا لگا جیسے میری زندگی کا ایک حصہ ختم ہوگیا ہو۔
انہوں نے شہداء کی تشییع میں عوام کی شرکت کے بارے میں کہا کہ آج ایک بڑا واقعہ پیش آیا۔ ابتدائی تخمینے کے مطابق تقریباً بارہ لاکھ پچاس ہزار افراد نے اس میں شرکت کی، جو کہ لبنان کی کل آبادی کا ۲۶ فیصد بنتا ہے۔
نبیہ بری نے مزید کہا کہ یہ عوامی شرکت لبنان میں مقاومت اور عوام کے درمیان گہرے تعلق کو ظاہر کرتی ہے۔ مقاومت لبنان کا ایک ناگزیر حصہ ہے۔ لبنان کے لوگ ان مجاہدین کا شکر گزار ہیں جنہوں نے داعش اور اسرائیل کے خلاف ان کا دفاع کیا۔
