مہا کمبھ میں خواتین کے نہانے کی ویڈیوز بیچنے والے سوشل میڈیا اکاؤنٹس پر کارروائی

اترپردیش پولس نے پریاگ راج مہاکمبھ میں خواتین کے اسنا ن یعنی  غسل کرنے والوں کی فحش ویڈیوز پوسٹ کرنے اور فروخت کرنے والے سوشل میڈیا اکاؤنٹس کے خلاف مقدمہ درج کیا ہے۔ اتر پردیش کے ڈائریکٹر جنرل آف پولیس پرشانت کمار کی ہدایت پر سوشل میڈیا پر مہا کمبھ سے متعلق قابل اعتراض پوسٹس اور افواہیں پھیلانے والوں کی مسلسل نشاندہی کی جا رہی ہے اور ان کے خلاف کارروائی کی جا رہی ہے۔

آج تک کی خبر کے بعد دو معاملات میں کیس درج کیے گئے ہیں، جن میں سے ایک میں انسٹاگرام اکاؤنٹ کے خلاف کیس درج کیا گیا ہے۔ اس اکاونٹ سے خواتین اسنان کرنے  والوں کی فحش ویڈیوز پوسٹ کی جا رہی تھیں۔ دوسرے کیس میں ٹیلی گرام چینل سی سی ٹی وی چینل 11 کے خلاف ایف آئی آر درج کی گئی ہے۔ اس چینل پر خواتین نہانے والوں کی ویڈیوز مختلف قیمتوں پر دستیاب کی جا رہی تھیں۔ پولیس نے اس معاملے میں قانونی کارروائی شروع کر دی ہے اور ملزمان کی گرفتاری کے لیے کوششیں جاری ہیں۔ مہاکمبھ میں اب تک سوشل میڈیا سے متعلق 12 ایف آئی آر درج کی گئی ہیں۔

سرکاری اعداد و شمار کے مطابق، اب تک 50 کروڑ سے زیادہ لوگ مہا کمبھ میں ڈوبکی لگا  چکے ہیں۔ ہر روز لاکھوں لوگ اس عظیم تہوار کا حصہ بننے جا رہے ہیں اور ہر ایک کے ہاتھ میں موبائل ہے۔ ایسے میں یہ باخبر رکھنا آسان نہیں ہے کہ کون کس کی تصویر لے رہا ہے اور کس کی ویڈیو بنائی جا رہی ہے۔ لیکن مہا کمبھ میں ایک خطرناک ٹرینڈ چل رہا ہے، جس میں مہا کمبھ کے نام سے خواتین کے نہانے کی تصاویر اور ویڈیوز بڑے پیمانے پر سوشل میڈیا پر شیئر کی جا رہی ہیں۔ انہیں نہ صرف بانٹاجا رہا ہے بلکہ انہیں بیچ کر پیسہ بھی کمایا جا رہا ہے۔

ان تصاویر اور ویڈیوز کو فیس بک، یوٹیوب اور انسٹاگرام پرمہا  کمبھ کے نام پر ‘#mahakumbh2025’، ‘#gangasnan’، اور ‘#prayagrajkumbh’ جیسے ہیش ٹیگز کے ساتھ بڑے پیمانے پر شیئر کیا جا رہا ہے۔ خطرناک بات یہ ہے کہ ان میں سے بہت سے سوشل میڈیا اکاؤنٹس خواتین کے نہانے کی ویڈیوز کو لوگوں کو ٹیلی گرام چینلز کی طرف راغب کرنے کے لیے استعمال کر رہے ہیں جن میں فحش مواد موجود ہے۔