کمیونٹی ڈیولپمنٹ سینٹر کے قیام کا بنیادی مقصد ملت کی ہمہ جہت ترقی کو یقینی بنانا ہے، جس میں خاص طور پر تعلیمی، معاشی اور سماجی ترقی کو پیشِ نظر رکھا گیا ہے۔اور پہلے مرحلے میں تعلیم اور معاشی استحکام پر خصوصی توجہ دی جائے گی۔ ملت میں شعور بیدار کرنے کے ساتھ ساتھ مختلف سرکاری اور غیر سرکاری اسکیموں کی رہنمائی اور ہر ممکن مدد فراہم کی جائے گی۔ان خیالات کا اظہارڈاکٹرمحمد خالد مبشر الظفر، امیرِ حلقہ جماعت اسلامی ہند، تلنگانہ نے راہاہیبیٹیٹ لکڑی کا پل حیدرآبادمیں کمیونٹی ڈیولپمنٹ سینٹر کے قیام اور اسکے افتتاح کے موقع پر کیا۔ڈاکٹرمحمد خالد مبشر الظفر نے اس سینٹر کا افتتاح کرتے ہوئے نیک تمناؤں کا اظہار کیا اور جماعت اسلامی ہند کی جانب سے مکمل تعاون کا یقین دلایا۔ ڈاکٹر ایم کے ایم ظفرنے اس بات پر زور دیا کہ ملت کے تمام مکاتبِ فکر، علما، دانشوران اور مختلف جماعتوں کے ذمہ داران کو ساتھ لے کر یہ مرکز کام کرے، تاکہ ایک مربوط اور موثر نظام تشکیل دیا جا سکے۔ڈاکٹر شیخ محمد عثمان، سکریٹری شعبہ ملی امور جماعت اسلامی ہند، تلنگانہ نے سینٹر کے اغراض و مقاصد پر تفصیل سے روشنی ڈالی اور گیارہ رکنی مشاورتی ٹیم کا انتخاب کیا۔ انہوں نے اعلان کیا کہ آئندہ دو دنوں میں اس ٹیم کا اجلاس منعقد کیا جائے گا۔ جس میں تعلیم، معیشت، صحت، میڈیا اور ریٹائرڈ سرکاری افسران شامل ہوں گے تاکہ سینٹر کے عملی اقدامات کو بہتر طریقے سے منظم کیا جا سکے۔یہ کمیونٹی ڈیولپمنٹ سینٹر ملت کے لیے ایک امید کی کرن ہے، جو تعلیم، معاشی خود کفالت اور سماجی ترقی کے میدان میں ایک مثالی کردار ادا کرے گا۔اس موقع پر اسکل ڈیولپمنٹ اور مائیکرو فنانس کے حوالے سے بھی گفتگو ہوئی۔ اجلاس میں اعلیٰ تعلیم یافتہ افراد، مختلف شعبہ ہائے زندگی سے تعلق رکھنے والے ماہرین اور دانشوروں نے شرکت کی۔سینٹر کا مرکزی دفتر راہاہیبیٹیٹ لکڑی کا پل صبح 11بجے دن تا شام 5بجے کام کریگا۔مزید تفصیلات کے لئے موبایل نمبر 9394071672پر رابطہ کیا جاسکتا ہے۔
