ممبئی ۔ ریاست مہاراشٹرا کے ناسک گجرات ہائی وے پر اتوار کی صبح ایک دل دہلا دینے والے سڑک حادثے میں لگژری بس 200 فٹ گہری کھائی میں جاگری جس کے نتیجہ میں دو بچوں سمیت 7 افراد کی ہلاکت اور پندرہ سے زائد افراد کے زخمی ہونے کی اطلاعات موصول ہوئی ہیں۔
پولیس سپرنٹنڈنٹ ایس جی پاٹل نے خبررساں ایجنسی یو این آئی اردو سروس کو بتایا کہ یہ حادثہ اس وقت پیش آیا جب بس ساپوتارہ پہاڑی اسٹیشن کے قریب گزر رہی تھی اور اچانک گاڑی ڈرائیور کے قابو سے باہر ہو گئی۔
بس میں سوار تمام 47 مسافروں کا تعلق مدھیہ پردیش کے گنا، شیوپوری اور اشوک نگر اضلاع سے تھا۔ یہ زائرین مختلف مندروں کا دورہ کرکے مہاراشٹر کے ترمبکیشور مندر میں مذہبی رسومات ادا کر کے گجرات کے دوارکا مندر کی طرف جا رہے تھے۔
اطلاعات کے مطابق ان اضلاع سے عقیدت مندوں کا ایک گروپ مذہبی سفر پر نکلا تھا اور وہ اتر پردیش، مہاراشٹر اور گجرات کے مختلف یاتری مقامات کا دورہ کر رہے تھے۔ یہ زائرین چار بسوں میں سفر کر رہے تھے جن میں سے ایک بس حادثے کا شکار ہوئی۔
حکام نے بتایا کہ زخمیوں کو مقامی ہاسپٹل منتقل کیا گیا۔
