حیدرآباد(پریس نوٹ)پولیس کمانڈکنٹرول روم(ائی سی سی سی) بنجارہ ہلز میں شہرحیدرآباد کے پولیس ملازمین کو تربیت فراہم کرنے کے مقصد سے چار روزہ سی پی آر (کارڈیو پلمونری ریسیوسیٹیشن) پروگرام کا افتتاح سی وی آنند کمشنر آف پولیس حیدرآباد نے کیا
۔اس موقع پر بات کرتے ہوئے پولیس کمشنر نے کہا کہ سی پی آر ٹریننگ پروگرام مائتری ہاسپٹل (مہدی پٹنم) کے تعاون واشتراک سے منعقدکیاجارہا ہے۔ انہوں نے پہلے مرحلے میں 1409 پولیس اہلکاروں کو سی پی آر کی تربیت فراہم کرنے پر ہاسپٹل انتظامیہ کا شکر ادا کیا۔4 روزہ ٹریننگ کے دوسرے مرحلے میں کل 1248 حیدرآباد سٹی پولیس افسران اور اہلکار حصہ لیں گے۔ انہیں 15 مختلف بیاچس میں تقسیم کیاجائے گا اور ہر بیاچ کو 90 منٹ تک تربیت دی جائے گی۔انہوں نے کہا کہ یہ ایک اہم پروگرام ہے جو نہ صرف پولیس اہلکاروں بلکہ عام لوگوں کے لیے بھی کارآمد ثابت ہوگا۔سی پی آر جسم میں خون اور آکسیجن کی سپلائی کو بحال کرتا ہے
جوحرکت قلب بند ہونے کی وجہ سے رک گیا ہے۔ جس سے دل دوبارہ دھڑکنے لگتا ہے اور بیہوش شخص کو ہوش آتا ہے۔انہوں نے کہاکہ سی پی آر دل سے آکسیجن والے خون کو دماغ سمیت تمام اعضاء تک پہنچانے میں مدد کرتا ہے۔ یہ دماغی موت کو روکتا ہے۔ سی پی آر شروع کرنے میں کوئی تاخیر دماغ کو ناقابل واپسی نقصان پہنچا سکتی ہے
۔ اس لیے ہوش کھونے والے شخص کے لیے فوری طور پر سی پی آر شروع کر دینا چاہئے۔ سی پی آر شروع کرنے میں ہچکچاہٹ نہ کریں۔ ہنگامی صورت حال میں، ہر سیکنڈ کی گنتی اور سی پی آر کے آغاز میں تاخیر جان لیوا ہو سکتی ہے۔ جب آپ سی پی آر کر رہے ہوں،ایمرجنسی میڈیکل مدد کیلئے فوری کال بھی کریں۔ انہوں نے کہاکہ ایک سروے کے مطابق98فیصد ہندوستانی آبادی سی پی آر کے طریقہ کار سے واقف نہیں ہے۔
یہ ہنگامی حالات میں جان بچانے کا ایک انتہائی اہم اور بنیادی طریقہ ہے۔انہوں نے کہاکہ دیگر ممالک جیسے امریکہ، جاپان، سنگاپور اور یورپی ممالک نے اپنے تعلیمی نظام میں CPR کو لازمی قرار دیا ہے۔ سی پی آر کے بارے میں آگاہی نہ ہونے کی وجہ سے اموات میں اضافہ ہو رہا ہے۔ دنیا بھر میں روزانہ 1.15 لاکھ افراد دل کا دورہ پڑنے سے موت کے منہ میں چلے جاتے ہیں۔
ورلڈ ہیلتھ آرگنائزیشن کے مطابق ہر سال تقریباً 5.8 کروڑ لوگ حرکت قلب بند ہوجانے سے فوت ہوجاتے ہیں۔۔انہوں نے کہا کہ سی پی آر کے بارے میں ہر کسی میں شعور بیدارکرنا بہت ضروری ہے۔کمشنر آف پولیس حیدرآباد نے اسپتال کے حکام سے درخواست کی کہ وہ حیدرآباد کے تمام 16000 پولیس افسران اور اہلکاروں کوسی پی آر کی تربیت دیں۔اس پروگرام میں رکشیتا کرشنا مورتی (آئی پی ایس)، انوپ جئے کمار(سی ٹی سی پرنسپل، پیٹلا بروج)،پولیس کے اعلیٰ عہدیداران کے علاوہ مائتری ہاسپٹل مہدی پٹنم کے ڈاکٹرس وعملہ ڈاکٹر محمد محب حسین(میڈیکل سپرٹنڈنٹ)، نذیر الدین احمد(اسسٹنٹ جنرل منیجر) ڈاکٹر محمد صادق اعظم (کارڈیالوجسٹ)، ڈاکٹر فیصل احمد، ڈاکٹر زوہا سفیان اور دیگر نے شرکت کی۔
