[]
نئی دہلی: کانگریس کے صدر ملکارجن کھڑگے، سابق صدر سونیا گاندھی اور پرینکا گاندھی واڈرا نے آج سابق وزیر اعظم راجیو گاندھی کو ان کے یوم پیدائش پر ان کی سمادھی ویر بھومی پر دلی خراج عقیدت پیش کیا۔
کانگریس لیڈر اور سابق وزیر اعظم کے بیٹے راہول گاندھی ان دنوں لیہہ میں ہیں اور انہوں نے اپنے والد اور سابق وزیراعظم راجیو گاندھی کی تصویر پر پھول چڑھا کرخراج عقیدت پیش کیا۔
پارٹی ملک بھر میں سابق وزیر اعظم کی یوم پیدائش کو سدبھاونا دیوس کے طور پر منا رہی ہے اور پارٹی کا کہنا ہے کہ پارٹی کارکنان ملک بھر میں جدید ہندوستان کے خالق کو یاد کر رہے ہیں۔
مسٹر گاندھی نے ٹویٹ کیا “پاپا، آپ کی آنکھوں میں ہندوستان کے لئے جوخواب تھے، ان انمول یادوں سے چھلکتے ہیں ۔آپ کے نشان میرا راستہ ہیں۔ ہر ہندوستانی کی جدوجہد اور خوابوں کو سمجھ رہا ہوں، بھارت ماتا کی آواز سن رہا ہوں۔
محترمہ پرینکا گاندھی نے لکھا، “ کسی کی مسکراہٹوں پہ ہو نِثار کسی کا درد مل سکے تو لے اُدھار کسی کے واسطے ہو تیرے دِل میں پیار جینا اسی کا نام ہے—- زندہ ہے ہمیں سے نام پیار کا کہ مر کے بھی کسی کو یاد آئیں گے ، کسی کے آنسووں میں مسکرائیں گے، کہے گا پھول ہر کلی سے بار بار جینا اسی کا نام ہے۔ یہ لائنیں ہمیشہ آپ کی یاد دلاتی ہیں اور آج تک جب یہ گانا سنتی ہوں ، میری آنکھوں میں آنسو آجاتےہیں ۔
کھڑگے نے کہا ’’آج جب ہم سدبھاونا دیوس منا رہے ہیں، یہ ان کے بے پناہ تعاون کا نتیجہ ہے جنہوں نے ہندوستان کو 21ویں صدی میں آگے بڑھایا۔ ان کی کئی مداخلتیں جیسے ووٹنگ کی عمر کو 18 سال تک کم کرنا، پنچایتی راج کو مضبوط کرنا، ٹیلی کمیونیکیشن اور آئی ٹی انقلاب، کمپیوٹرائزیشن پروگرام، امن معاہدوں کو جاری رکھنا، یونیورسل ٹیکہ کاری پروگرام اورجامع تعلیم پر زور دینے والی ایک نئی تعلیمی پالیسی سے ملک میں انقلابی تبدیلیاں آئیں۔ہم راجیو گاندھی جی کو ان کی یوم پیدائش پر دلی خراج عقیدت پیش کرتے ہیں۔
آج سابق وزیر اعظم راجیو گاندھی کا 79 واں یوم پیدائش ہے۔ سونیا گاندھی، پرینکا گاندھی اور رابرٹ واڈرا نے دہلی میں ان کی سمادھی ویر بھومی پہنچ کر انہیں خراج عقیدت پیش کیا۔ اس موقع پر کانگریس صدر ملکارجن کھڑگے اور کے سی وینوگوپال بھی موجود تھے۔
