[]
مہر خبررساں ایجنسی نے المسیرہ ٹی وی چینل کے حوالے سے خبر دی ہے کہ یمن کی مسلح افواج کے ترجمان “یحیی سریع” نے کہا کہ جارح امریکی اور برطانوی طیاروں نے یمن کے دارالحکومت صنعا اور دیگر علاقوں پر 18 فضائی حملے کئے۔ تاہم اس جارحیت کا بھرپور جواب دیا جائے گا۔
انہوں نے واضح کیا کہ امریکہ اور برطانیہ کی جارحیت یمنی قوم کو فلسطین کے مظلوم عوام کی حمایت سے نہیں روک سکے گی۔
ادھر یمن کی سپریم پولیٹیکل کونسل کے رکن “محمد علی الحوثی” نے امریکہ اور برطانیہ کی نئی بمباری کو یمن کو غزہ کی حمایت سے روکنے کی ایک نئی کوشش قرار دیتے ہوئے زور دے کر کہا: امریکیوں اور برطانویوں کو یہ سمجھ لینا چاہیے کہ ہم ردعمل کے مرحلے پر ہیں اور ہتھیار ڈالنا ہماری ڈکشنری میں نہیں ہے۔
اس دوران تحریک انصار اللہ کے سیاسی دفتر کے رکن “محمد البخیتی” نے اپنے سوشل میڈیا اکاؤنٹ پر یمن کے خلاف جارحیت پر ردعمل دیتے ہوئے انگریزی میں لکھا: یمن پر بمباری کے حجم سے قطع نظر، اسرائیل کے خلاف یمن کی فوجی کارروائیاں غزہ میں نسل کشی کے جرائم کے خاتمے تک جاری رہیں گی۔
واضح رہے کہ کہ آج صبح امریکہ اور برطانیہ کے طیاروں نے یمن پر اندھا دھند بمباری کی۔
اس سلسلے میں ایک امریکی اہلکار نے الجزیرہ کو انٹرویو دیتے ہوئے کہا: ’’امریکی، برطانوی اور دیگر اتحادی افواج نے یمن میں حملے کئے ہیں۔
