[]
نئی دہلی/بنگلورو: کانگریس اور اپوزیشن کی 26 جماعتوں کے لیڈروں کے کرناٹک کی راجدھانی بنگلورو میں منگل کو تشکیل پانے والے اتحاد ‘انڈیا’ نے بھارتیہ جنتا پارٹی کو اقتدار سے بے دخل کرنے کا اجتماعی عہد کیا اور کہا کہ سبھی اپوزیشن جماعتیں بی جے پی کے تقسیم نظریہ کے خلاف متحد ہیں۔
حزب اختلاف کی جماعتوں نے بی جے پی کو اقتدار سے بے دخل کرنے کا عزم ظاہر کرتے ہوئے کہا، ’’ہم، ہندوستان کی 26 ترقی پسند جماعتوں کے دستخط شدہ لیڈر آئین میں درج ہندوستان کے نظریہ کا دفاع کرنے کے اپنے عزم کا اظہار کرتے ہیں۔
بی جے پی کی طرف سے منظم طریقے سے ہماری جمہوریہ کے کردار پر شدید حملہ کیا جا رہا ہے۔ ہم اپنے ملک کی تاریخ کے انتہائی نازک موڑ پر ہیں۔ ہندوستانی آئین کے بنیادی ستونوں یعنی سیکولر جمہوریت، معاشی خودمختاری، سماجی انصاف اور وفاقیت کو منظم اور خطرناک طریقے سے کمزور کیا جا رہا ہے۔
قرارداد میں کہا گیا ہے، ’’ہم منی پور میں پیش آنے والے انسانی المیے پر اپنی گہری تشویش کا اظہار کرتے ہیں۔ وزیراعظم کی خاموشی حیران کن اور بے مثال ہے۔ منی پور کو امن اور مفاہمت کی راہ پر واپس لانے کی فوری ضرورت ہے۔
ہم جمہوری طور پر منتخب ریاستی حکومتوں کے آئین اور آئینی حقوق پر جاری حملے کا مقابلہ کرنے کے لیے پرعزم ہیں۔ ہماری سیاست کے وفاقی ڈھانچے کو دانستہ طور پر کمزور کرنے کی کوشش کی جا رہی ہے۔ غیر بی جے پی حکومت والی ریاستوں میں گورنروں اور لیفٹیننٹ گورنروں کا کردار آئینی معیارات سے تجاوز کر گیا ہے۔
اپوزیشن جماعتوں کی اجتماعی قرارداد میں کہا گیا ہے، ”سیاسی حریفوں کے خلاف بی جے پی حکومت کی ایجنسیوں کا کھلم کھلا غلط استعمال ہماری جمہوریت کو کمزور کر رہا ہے۔ غیر بی جے پی حکومت والی ریاستوں کی جائز ضروریات، تقاضوں اور حقوق سے مرکز کی طرف سے فعال طور پر انکار کیا جا رہا ہے۔
ہم اشیائے ضروریہ کی مسلسل بڑھتی ہوئی قیمتوں اور ریکارڈ بے روزگاری کے سنگین معاشی بحران کا مقابلہ کرنے کے اپنے عزم کو مضبوط کرتے ہیں۔ نوٹوں کی منسوخی اپنے ساتھ ایم ایس ایم ای اور غیر منظم شعبوں میں ان کہی حالت زار لائی، جس کے نتیجے میں ہمارے نوجوانوں کے لیے بڑے پیمانے پر بے روزگاری آئی۔
ہم من پسند دوستوں کو ملکی جائیداد کی لاپرواہی سے فروخت کی مخالفت کرتے ہیں۔ ہمیں ایک مضبوط اور اسٹریٹجک پبلک سیکٹر کے ساتھ ساتھ ایک مسابقتی اور فروغ پزیر پرائیویٹ سیکٹر کے ساتھ ایک منصفانہ معیشت کی تعمیر کرنی چاہیے، جس میں انٹرپرائز کے جذبے کو پروان چڑھایا جائے اور توسیع کا ہر موقع فراہم کیا جائے۔ کسان اور کھیت مزدور کی فلاح و بہبود کو ہمیشہ اولین ترجیح ملنی چاہیے۔
انہوں نے کہا، “ہم اقلیتوں کے خلاف پیدا کی جا رہی نفرت اور تشدد کو شکست دینے کے لئے ساتھ ہیں اور خواتین، دلتوں، قبائلیوں اور کشمیری پنڈتوں کے خلاف بڑھتے ہوئے جرائم کو روکنے کے لیے تمام سماجی، تعلیمی اور اقتصادی طور پر پسماندہ برادریوں سے تعلق رکھنے والوں کے لئے ایک منصفانہ سماعت کی مانگ کرتے ہیں اور پہلے قدم کے طور پر ذات پر مبنی مردم شماری نافذ کریں۔
اپوزیشن جماعتوں نے کہا، “ہم اپنے ساتھی ہندوستانیوں کو نشانہ بنانے، ہراساں کرنے اور دبانے کی بی جے پی کی منظم سازش کا مقابلہ کرنے کا عزم کرتے ہیں۔ ان کی نفرت پر مبنی مہم نے حکمران جماعت اور اس کے تفرقہ انگیز نظریے کی مخالفت کرنے والوں کے خلاف شیطانی تشدد کو جنم دیا ہے۔
یہ حملے نہ صرف آئینی حقوق اور آزادیوں کی خلاف ورزی کر رہے ہیں بلکہ ان بنیادی اقدار کو بھی تباہ کر رہے ہیں جن پر جمہوریہ ہند کی بنیاد رکھی گئی ہے – آزادی، مساوات اور بھائی چارہ اور انصاف – سیاسی، معاشی اور سماجی۔ بی جے پی کی ہندوستانی تاریخ کو دوبارہ تخلیق اور دوبارہ لکھ کر عوامی گفتگو کو آلودہ کرنے کی بار بار کوششیں سماجی ہم آہنگی کی توہین ہے۔
ہم قوم کے سامنے ایک متبادل سیاسی، سماجی اور اقتصادی ایجنڈا پیش کرنے کا عزم کرتے ہیں۔ ہم حکمرانی کے جوہر اور انداز دونوں کو تبدیل کرنے کا وعدہ کرتے ہیں جو زیادہ مشاورتی، جمہوری اور شراکت دار ہو گا۔ جئے ہند۔
