[]
لاہور: پاکستان کے سابق کرکٹر عبدالرزاق نے سوشل میڈیا صارفین کی جانب سے بالی ووڈ اداکارہ ایشوریا رائے کے بارے میں نامناسب گفتگو کرنے پر شدید تنقید کے بعد معافی مانگ لی ہے۔ سماجی رابطوں کی ویب سائٹ ایکس (ٹوئٹر) پر عبدالرزاق کی ویڈیو وائرل ہے جس میں انہیں ایشوریا رائے کے بارے میں اپنی گفتگو پر معافی مانگتے ہوئے دیکھا جا سکتا ہے۔
عبدالرزاق نے اپنی ویڈیو میں کہا کہ ’کل پریس کانفرنس میں کرکٹ کی بات ہو رہی تھی، کوچنگ کی بات ہو رہی تھی اور نیت کی بات ہو رہی تھی، اور میری زبان پھسل گئی اور میں نے مثال کوئی اور دینی تھی اور ایشوریا رائے جی کا نام میرے منہ سے نکل گیا۔‘ سابق آل راؤںڈر مزید کہتے ہیں کہ ’میں اس پر بہت معذرت خواہ ہوں اور معافی چاہتا ہوں اُن سے، میرا مقصد ایسا نہیں تھا۔‘
واضح رہے کہ اس سے قبل سوشل میڈیا پر عبدالرزاق کی ایک ویڈیو وائرل ہوئی تھی جس میں وہ ایک تقریب میں شریک تھے جہاں دوران گفتگو انہوں نے ہندی فلموں کی سپرسٹار اداکارہ ایشوریا رائے کے بارے میں گفتگو کی تھی۔
اس تقریب میں عبدالرزاق کے ساتھ پاکستان کے سابق کرکٹرز شاہد آفریدی، عمر گل اور سعید اجمل بھی شریک تھے۔ سوشل میڈیا صارفین کی بہت بڑی تعداد نے عبدلرزاق کی ایشوریا رائے کے بارے میں گفتگو کو ’غیر مہذب‘ اور ناشائستہ قرار دے کر ان پر شدید تنقید کر رہے رھے۔
ویڈیو میں یہ بھی دیکھا جا سکتا ہے کہ عبدالرزاق جب اداکارہ کے بارے میں گفتگو کرتے ہیں تو اُن کے ساتھ بیٹھے ہوئے شاہد آفریدی اور عمر گل بھی تالیاں بجا کر ہنسنے لگ جاتے ہیں۔ اس ویڈیو کے وائرل ہونے بعد سابق آل راؤںڈر کو سوشل میڈیا پر بھرپور تنقید کا نشانہ بنائے جانے لگا اور صارفین کی جانب سے مطالبہ کیا گیا کہ عبدالرزاق ایسی گفتگو پر معافی مانگیں۔
