جے رام رمیش نے ایکس (سابق ٹوئٹر) پر اپنے بیان میں کہا کہ وزیراعظم اکثر غیر ملکی دوروں پر رہتے ہیں اور اس سے بھی زیادہ اکثر جھوٹ بولتے ہیں۔ انہوں نے الزام لگایا کہ چین کا یہ دورہ ایک نہایت اہم موقع ہے کیونکہ ہندوستان اور امریکہ کے تعلقات میں دراڑ کا فائدہ اٹھاتے ہوئے چین اپنی شرائط مسلط کرنے کی کوشش کر رہا ہے۔
انہوں نے یاد دلایا کہ چند ماہ قبل آپریشن سندور کے دوران ہندوستانی فوجی اداروں نے خود انکشاف کیا تھا کہ چین اور پاکستان ایک دوسرے کے ساتھ تال میل میں کام کر رہے تھے لیکن اب یہ معاملہ گویا فراموش کر دیا گیا ہے۔ ان کے مطابق اس پس منظر میں مودی کا چین جانا کئی سوالات کو جنم دیتا ہے۔
