خیال رہے کہ جگدیپ دھنکھڑ نے پیر، 21 جولائی کو اپنے استعفیٰ کا اعلان کیا تھا اور اسی روز صدر جمہوریہ دروپدی مرمو سے ملاقات بھی کی تھی۔ صدر نے اگلے دن یعنی منگل کو ان کا استعفیٰ منظور کر لیا۔ آئین کے آرٹیکل 68 کے مطابق نائب صدر کا عہدہ خالی ہونے کی صورت میں جلد از جلد نئے نائب صدر کا انتخاب ضروری ہے۔
نائب صدر کے انتخاب کا طریقہ بھی آئینی طور پر طے شدہ ہے۔ اس عہدے کے لیے ووٹنگ صرف پارلیمنٹ کے اراکین کے ذریعے ہوتی ہے، جن میں لوک سبھا اور راجیہ سبھا کے تمام منتخب اور نامزد اراکین شامل ہوتے ہیں۔ کسی بھی امیدوار کو نامزد ہونے کے لیے کم از کم 20 تجویز کنندگان اور 20 تائید کنندگان کی ضرورت ہوتی ہے، جو سب کے سب پارلیمنٹ کے موجودہ اراکین ہوں۔ اس کے ساتھ 50 ہزار روپے کی ضمانت بھی جمع کرانا لازم ہے۔
