انہوں نے اپنے بیان میں ہندوستان اور نمیبیا کے تاریخی تعلقات کا ذکر کرتے ہوئے واضح کیا کہ نمیبیا کی آزادی سے بہت پہلے، ہندوستان نے سام نجوما اور ان کی تنظیم سواپو (ساؤتھ ویسٹ افریقہ پیپلز آرگنائزیشن) کی بھرپور حمایت کی تھی۔ جواہر لال نہرو نے نجوما کو ستمبر 1961 میں بلغراد میں منعقدہ پہلی نان الائنڈ سمٹ میں شرکت کی دعوت دی تھی۔
مزید یہ کہ اندرا گاندھی نے مارچ 1983 میں نجوما کو نئی دہلی مدعو کیا، جہاں انہوں نے ساتویں نان الائنڈ کانفرنس میں شرکت کی۔ اس کانفرنس کے بعد ہندوستان-نمیبیا تعلقات میں تیزی آئی اور مئی 1986 میں نئی دہلی میں سواپو کا پہلا سفارت خانہ قائم ہوا۔ اگست 1986 میں نجوما نے راجیو گاندھی سے بھی ملاقات کی۔
