ہارورڈ یونیورسٹی نے اس صدارتی حکم کے خلاف عدالت میں درخواست دائر کرتے ہوئے مؤقف اختیار کیا کہ یہ اقدام وائٹ ہاؤس کی مخالفت پر مبنی ہے اور ادارے کے خلاف انتقامی کارروائی ہے۔ جمعرات کو دائر کیے گئے ایک ترمیم شدہ مقدمے میں یونیورسٹی نے الزام لگایا کہ صدر ٹرمپ عدالت کے پچھلے احکامات کو نظرانداز کرنے کی کوشش کر رہے ہیں۔
یہ پابندی ان حالات میں لگائی گئی جب ٹرمپ انتظامیہ نے ملک بھر میں غیر ملکی طلبہ کے ویزوں کی جانچ پڑتال سخت کر دی ہے۔ کچھ روز قبل امریکی وزیر خارجہ مارکو روبیو نے اعلان کیا تھا کہ امریکہ چین کے طلبہ کے ویزے منسوخ کرے گا۔ اس کے ساتھ ہی ہوم لینڈ سکیورٹی ڈیپارٹمنٹ نے 22 مئی کو ایک حکم جاری کیا تھا جس کے تحت مخصوص غیر ملکی طلبہ کے نام اندراج پر بھی روک لگا دی گئی تھی، جس سے ہزاروں طلبہ کا تعلیمی مستقبل متاثر ہوا۔
