[]
بنگلورو: کرناٹک میں پیر کے دن گنیش تہوار کا آغاز ہوا۔ یہ 10 روزہ تہوار بنگلوروکے بشمول ساحلی علاقہ‘ شمالی و جنوبی کرناٹک میں منایا جارہا ہے۔ گنیش کی بڑی بڑی مورتیاں منڈپوں میں بٹھائی گئیں۔
پچھلے سالوں کے مقابلہ اِس بار زیادہ جوش و خروش سے اسے منایا جارہا ہے۔ مسلمانوں نے خیرسگالی کے قابل ِ تعریف اقدا م میں شہر بیلگاوی میں عید میلادالنبی ؐ کا جلوس آگے بڑھادیا۔
28 ستمبر کو گنیش جلوس نکلے گا۔ اسی دن میلاد جلوس نکلتا تو پولیس کے لئے نظم وضبط کی صورتِ حال سے نمٹنے کافی مشکل ہوجاتا۔
انجمن اسلام اور دیگر مسلم تنظیموں نے میٹنگ کی اور میلاد جلوس 28 ستمبرسے بڑھاکر یکم اکتوبر کو نکالنے کا فیصلہ کیا۔ مسلم رہنماؤں نے کہا کہ وہ گنیش تہوار اور جلوس میں حصہ لیں گے اور ہندوؤں کو بھی عید میلاد النبیؐ میں مدعو کریں گے۔
بیلگاوی نارتھ کے کانگریس رکن اسمبلی راجو سیٹھ نے کہا کہ مسلم فرقہ کا یہ اقدام سماج میں ہم آہنگی پیدا کرے گا۔ گنیش منڈلی کے منتظم وکاس کل گھٹگی نے مسلمانوں کے فیصلہ کو تاریخی قراردیا۔ اس نے کہا کہ ہندو اور مسلمان گنیش اور عید میلادؐ منائیں گے۔
