گورو گگوئی کو گزشتہ ہفتے پارٹی کی مرکزی قیادت نے آسام کانگریس کی صدارت کے لیے منتخب کیا تھا۔ یہ فیصلہ ایسے وقت میں کیا گیا جب آسام کے وزیر اعلیٰ ہمنت بسوا شرما نے گگوئیکی برطانوی اہلیہ کو پاکستانی خفیہ ایجنسی آئی ایس آئی سے مبینہ تعلقات کے حوالے سے نشانہ بنایا تھا۔
گزشتہ ہفتے گورو گگوئی دہلی سے اپنے حلقہ انتخاب زورہٹ پہنچے تھے اور وہاں سے شوا سگر سے گواہاٹی تک تین روزہ دورہ کیا۔ اس دورے کے دوران وہ مختلف مقامات جیسے تیٹا بور، زورہٹ، ناگاوں، موریگاوں اور جاگیروڈ میں پارٹی کارکنوں سے ملے اور اپنے حامیوں سے خطاب کیا۔
گورو گگوئی کی قیادت میں کانگریس کو آسام کی سیاست میں نیا جوش اور ولولہ ملنے کی امید کی جا رہی ہے، خاص طور پر اگلے سال کے اسمبلی انتخابات کے تناظر میں۔
